İlham Şaban: "Nəticədə səhmi alanlara rüblük dividendlərin ödənilməsi baş verəcək"
SOCAR bir sıra birgə müəssisələrinin səhmlərini satışa çıxara bilər. Bunu SOCAR-ın prezidenti Rövnəq Abdullayev Bakı Fond Birjasının təkrar bazarında istiqrazların satışına başlanmasına həsr olunmuş mətbuat konfransında deyib.
Onun sözlərinə görə, hazırda bu istiqamətdə iş aparılır: "Söhbət səhmlərin nəzarət paketindən gedir. Biz səhmlərin az bir hissəsini satışa çıxara bilərik. Bununla da biz əhaliyə investisiya qoymaq üçün əlavə alətlər imkanı vermək istəyirik. Şirkət bu məsələ ilə bağlı Bakı Fond Birjası ilə danışıqlar aparır. Yəqin ki, gəlirlə işləyən müəssisələri seçəcəyik ki, həmin səhmlər vətəndaşlarımız üçün maraqlı olsun".
R.Abdullayev onu da vurğulayıb ki, SOCAR-ın özünün ilkin səhm bazarına (İPO) çıxmaq planı yoxdur. Şirkət prezidenti həmçinin qeyd edib ki, xarici borc bazarına çıxılması, bond buraxılması da gündəmdə deyil: "SOCAR istiqrazlarının buraxılmasında məqsəd xarici investorlara ödədiyimiz faizləri daxili investorlara yönəltməkdir. Xarici bazardan vəsait cəlb etsək, uzunmüddətli cəlb etməliyik, bu cür borclanma bizə uzunmüddətli layihələr üçün lazımdır. Hələ ki, belə bir plan yoxdur".
Bütövlükdə sözügedən birgə müəssisələr satışa çıxarılsa, bu, Azərbaycan iqtisadiyyatına nə verəcək?
Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, səhmdar cəmiyyət məfhumu bazar iqtisadiyyatında kapitalın iqtisadiyyata cəlb edilməsi alətlərindən biridir: "Ona görə ki, burada həm vətəndaşların, həm də şirkətlərin kapitalı cəlb edilir. Bunların yaxşı idarə edilməsi nəticəsində hər bir investora rüblük dividendin ödənilməsi gündəmə gəlir. Çox təəssüflər olsun ki, Azərbaycanda müstəqillikdən sonrakı 20 ildə səhmdar cəmiyyətlərin sayı 1000-ə qədər olsa da, onlardan cəmi 100-ü dividend vermək qabiliyyətində olub. Ancaq verilən dividendlər o qədər aşağı səviyyədə olub ki, insanlarda bu səhmdar cəmiyyətlərinin bəzi şəxslər tərəfindən sadəcə zəbt edilməsi təəssüratı yaranıb. İndi Dövlət Neft Şirkətinin də bəzi müəssisələri səhmdar cəmiyyət formasındadır. Həmin birgə müəssisələrin bir hissəsinin səhmlərinin satışa çıxarılması reallaşdırılsa və insanların ora vəsait cəlb etməsi mümkün olsa, bunun müsbət effekti olacaq. Təbii ki, insanların inamı yarandığı halda. Yəni əmin olsalar ki, qoyduqları vəsait batmayacaq, o zaman səhmləri almaqda maraqlı olacaqlar. Nəticədə səhmi alanlara rüblük dividendlərin ödənilməsi baş verəcək. Bu artıq digərlərinə yaxşı nümunə olacaq. Hesab edirəm ki, SOCAR tərəfindən belə bir təşəbbüs qaldırılması müsbət haldır. Qonşu Qazaxıstanda, Rusiyada bu təcrübə 20 ilə yaxındır həyata keçirilir. Ancaq biz hələ indi bu işə qərar veririk". Vidadi ORDAHALLI
