Samir Əliyev: "İnvestisiya qoyuluşu azaldığına görə bank kreditlərinin payı artıb"
Azərbaycanda investisiyaların strukturunda bank kreditlərinin payı 2 dəfəyə yaxın artıb. Azərbaycan iqtisadiyyatına investisiya qoyuluşunda bank kreditlərinin xüsusi çəkisi ötən ilin eyni dövrü ilə müqayisədə 4,2 faiz artaraq 9,8 %-ə yüksəlib.
Açıqlanan statistik rəqəmlərdə qeyd olunur ki, cari ilin yanvar-sentyabr ayları ərzində əsas kapitala yönəldilmiş vəsaitlərin 1 000,4 mln. manatı bank kreditlərinin payına düşüb. Bu da, öz növbəsində, əvvəlki ilin müvafiq dövrünə nisbətən müqayisəli qiymətlərlə 16,4 % çoxdur.
Qeyd edək ki, ölkə iqtisadiyyatına cəmi investisiyaların 71,7 %-ni və ya 7 366,2 mln. manatını müəssisə və təşkilatların vəsaitləri, 13,4 %-ni və ya 1 378,9 mln. manatını büdcə vəsaitləri, 1,1 %-ni və ya 112,6 mln. manatını büdcədənkənar fondların vəsaitləri, 3,8 %-ni və ya 385,8 mln. manatını əhalinin şəxsi vəsaitləri təşkil edib.
Azərbaycan investisiya strukturunda bank kreditlərinin payının iki dəfə artması barədə fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, bu, bankdan kənar investisiyaların həcminin azalması ilə bağlıdır: "Eyni zamanda, kommersiya bankları vasitəsilə real sektora yönəldilən kreditlərin həcminin artması ilə bağlıdır. İstehlak kreditlərinin həcminin azalması real sektora yönəldilən kreditlərə təsir göstərir. Artıq istehlak kreditlərinin həcmində azalmalar var. Bankların özünün kredit portfelinin strukturunda da müəyyən dəyişikliklər hiss olunur. Həmçinin, yerli investisiyaların həcmində də azalmalar var ki, bu da investisiya portfelinin strukturuna təsir göstərir. Məqsədəuyğundur ki, gələcəkdə kommersiya bankları tərəfindən verilən kreditlərin həcmi artıq olsun. Digər mənbələrdən əldə olunan sərmayələrin də həcmi artıq olarsa, bu, investisiya strukturunun dəyişməsinə şərait yaradacaq".
Digər iqtisadçı-ekspert Samir Əliyev bizimlə söhbətində qeyd etdi ki, ötən ilin müvafiq dövrü ilə müqayisədə ölkəyə qoyulan investisiya qoyuluşu azalıb. İnvestisiya qoyuluşu azaldığına görə bank kreditlərinin payı artıb: "Hər kəsə bəllidir ki, əvvəlki dövrlə müqayisədə bankların kredit qoyuluşunda azalma var. Bu azalma isə kifayət qədər yüksək rəqəmdir. Azalmanı ümumi investisiya qoyuluşu ilə əlaqələndirirəm".
Günel CƏLİLOVA
