Ruslan Atakişiyev: "İnkişaf etmiş ölkələrdə hüquqi şəxslər istiqrazların alınmasında daha aktiv iştirak edir"
SOCAR istiqrazları artıq bu gündən gəlir gətirməyə başlayır - istiqrazın üzərinə faizlər bu gündən etibarən hesablanır. Bu barədə SOCAR prezidenti Rövnəq Abdullayev Dövlət Neft Şirkətinin (SOCAR) istiqrazlarının satışının yekunlaşması və təkrar bazarda satışına başlanmasına həsr olunmuş mətbuat konfransında bildirib.
İstiqrazların buraxılmasındakı dəstəyə görə əlaqədar qurumlara təşəkkürünü bildirən R.Abdullayev qeyd edib ki, emissiya prospektində olduğu kimi, satışlarda üstünlük fiziki şəxslərə verilib: "Sifarişlərin 90 faizi fiziki şəxslərdən, cəmi 10 faizi isə hüquqi şəxslər və banklardan gəlib".
SOCAR prezidenti açıqlamasında onu da deyib ki, artıq ikinci faza - təkrar bazar başlayır. Bu gündən 2021-ci ilədək bu istiqrazlar dövriyyədə olacaq. SOCAR-ın təyin etdiyi market meyker istənilən fiziki və hüquqi şəxsə istiqrazları dərhal almaq imkanı yaradacaq: "Yəni artıq 1 saatdan sonra istənilən istiqraz sahibi aldığı istiqrazı sata bilər. Amma mən məsləhət görməzdim, çünki onlar 3 ay gözləyib faizlərini əldə edə bilər. Hətta bu günə istiqrazları gəlirlə satmaq mümkündür".
Ən əsası, SOCAR prezidentinin sözlərinə görə, istiqrazları almış fiziki və hüquqi şəxslər artıq bu gündən onu istənilən şəxsə, o cümlədən xaricilərə də sata bilər.
Bütün bunların fonunda, istiqrazların 90 faizini fiziki şəxslərin almasını ekspertlər necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin sədri Ruslan Atakişiyev bir sıra məqamlara toxundu: "Dollarlaşma prosesi onu göstərdi ki, yığımlar bu valyuta üzərində gedir. Xüsusən son dövrlər bank sektorunda baş verən proseslər də göstərdi ki, insanlar əmanətlərin yastıq altında saxlanmasına önəm verir. Görülən işlər çərçivəsində istiqrazların buraxılmasında məqsəd o idi ki, yastıq altında toplanan əmanətlər istiqrazların alınmasına yönəldilsin. Yəni həmin vəsaiti dövriyyəyə, işgüzar fəaliyyətə cəlb etmək mümkün olsun. İstiqrazların buraxılmasında məqsəd həm də fiziki şəxslərdə olan bu vəsaitləri cəlb etmək idi. Müşahidələr də göstərir ki, istiqrazların alınmasına fiziki şəxslər daha çox maraq göstərir. Digər tərəfdən, inkişaf etmiş ölkələrdə hüquqi şəxslər istiqrazların alınmasında daha aktiv iştirak edir. Hüquqi şəxs deyəndə, daha çox hüquqi investorlar bu işdə fəallıq göstərir. Bizdə isə vəziyyət bir qədər fərqlidir. Ancaq zamanla bu da öz həllini tapacaq. Digər tərəfdən, bu onu göstərir ki, Azərbaycanda hüquqi şəxs qismində investisiya fəaliyyətini həyata keçirəcək şirkətlərin fəaliyyəti zəifdir".
Vidadi ORDAHALLI
