Zakir Əhmədov: "Bu təkcə Neft Fondundan Beynəlxalq Banka 1 milyard dollarlıq depozitin yerləşdirilməsi ilə bağlı deyil"
Milli valyuta olan manat son günlər, cüzi də olsa, möhkəmlənməkdədir. Əsas səbəb kimi Beynəlxalq Bankın artıq keçirilən valyuta hərraclarında iştirak etməməsi göstərilir. Bildirilir ki, Neft Fondu sözügedən banka bir milyard dollar depozit yerləşdirdiyindən, bank hərraclardan çəkilib.
Ancaq fakt ondan ibarətdir ki, manat möhkəmlənməkdədir. Ən son məlumatlara görə, manat əksər xarici valyutalara qarşı bahalaşıb. Belə ki, ABŞ-ın milli valyutası olan dolların məzənnəsi oktyabrın 14-ü ilə müqayisədə 0,01 % ucuzlaşaraq 1,5969 manat təşkil edib. Avro isə manata nisbətən ucuzlaşıb. Avrozonanın vahid valyutası 0,4 % zəifləyərək 1,7543 manat olub. Əsas ticarət tərəfdaşlarımızdan biri olan Rusiyanın milli valyutası rubl oktyabrın 14-ü ilə müqayisədə dəyişməyərək 0,0253 manat səviyyəsində qalıb. Türkiyə lirəsinin məzənnəsi isə 0,25 % ucuzlaşaraq 0,5158 manat təşkil edib. Rəsmi məzənnəyə əsasən, 1 ingilis funt sterlinqi 1,9419 manatdır. Beləliklə, funt sterlinq 0,3 %-lik ucuzlaşma nümayiş etdirib.
Müşahidələr göstərir ki, dolların kursu 1 manat 60 qəpiklik psixoloji həddən aşağı düşəndən sonra manata inam daha da artmağa başlayıb. Məlumat üçün qeyd edək ki, ikinci devalvasiyadan sonra manat sonuncu dəfə may ayında möhkəmlənmişdi. Belə ki, may ayında dolların kursu 1 manat 49 qəpik olmuşdu.
Bütün hallarda, son günlər manatın dollara görə möhkəmlənməsini ekspertlər necə dəyərdəndirir? Məsələyə münasibət bildirən ekspert Zakir Əhmədovun fikrincə, bu, ölkə iqtisadiyyatı üçün müsbət tendensiyadır: "Son günlər manatın, cüzi də olsa, bahalaşması müşahidə edilir. Manatın məzənnəsinin artırılmasının neçə müddət davam edəcəyi müxtəlif müddətdə ölçülür. Bununla bağlı müxtəlif fikirlər var. Həmçinin bildirilir ki, yaxın gələcəkdə manatın növbəti ucuzlaşma ehtimalları makroiqtisadi göstəricilər sisteminə mənfi təsir göstərəcək.
Hər halda çoxşaxəli fikirlər səsləndirilir. Ancaq hesab edirəm ki, manatın möhkəmlənməsi davamlı xarakter ala bilər. Bu təkcə Neft Fondundan Beynəlxalq Banka 1 milyard dollarlıq depozitin yerləşdirilməsi ilə bağlı deyil. Ortada digər səbəblər də var. Məsələ ondadır ki, bir sıra hallarda, ölkədə dollara tələbatın real həcmi şişirdilir. Əslində dollara elə də böyük tələb yoxdur. Bir sıra layihələrin icrasının təxirə salındığı, icmal büdcənin azaldıldığı şəraitdə dollara tələbat necə böyük ola bilər?! Bu baxımdan hesab edirəm ki, manatın möhkəmlənməsi iqtisadiyyatda növbəti ildə aktivliyə stimul verə bilər". Vidadi ORDAHALLI
