Nüsrət İbrahimov: "Paytaxtda ilkin daşınmaz əmlak bazarında qiymətlər avqust ayındakı qiymətlərlə müqayisədə dollar ekvivalentində 4,43 faiz artıb"
Paytaxtda mənzillərin qiymətləri kəskin şəkildə bahalaşıb. Bakının ilkin və təkrar mənzil bazarlarında qiymət artımı bir neçə ay olar ki, müşahidə olunur.
Manatın məzənnəsinin dollara nisbətən dəyişməsindən sonra daşınmaz əmlak bazarında vəziyyət fərqli idi. Bəllidir ki, devalvasiyadan sonra mənzil bazarında durğunluq yaşandı. Satışa çıxarılan evlər uzun müddət alıcısız qaldı. Bu hal evlərin satış qiymətinə də təsir etmişdi. Ancaq indi isə iddia olunur ki, evlərin satış qiyməti dəyişib.
Mövzu ilə bağlı fikir bildirən əmlak məsələləri üzrə ekspert Nüsrət İbrahimov qeyd etdi ki, hazırda mənzillərin satış qiymətində artım var. Ekspertin sözlərinə görə, paytaxtda ilkin daşınmaz əmlak bazarında qiymətlər avqust ayındakı qiymətlərlə müqayisədə dollar ekvivalentində 4,43 faiz artıb. Manatla ifadədə isə artım 2,76 faiz təşkil edib.
Müsahibimiz vurğuladı ki, həmçinin, təkrar daşınmaz əmlak bazarında qiymətlərdə artım müşahidə olunub: "Ötən ay avqust ayı ilə müqayisədə dollar ekvivalentində artım 3,77 faiz, manatla ifadədə isə 2,11 faiz olub. Ancaq indisə faiz daha yüksəkdir".
Həmsöhbətimiz onu da əlavə etdi ki, daşınmaz əmlakın digər seqmentlərində qiymətlərin ucuzlaşması hələ davam edir: "Kommersiya obyektləri bazarında avqust ayı ilə müqayisədə sentyabrda qiymətlər dollar ekvivalentində 4,96 faiz, manatla ifadədə isə 6,48 faiz azalıb. Torpaq bazarında da müvafiq olaraq 0,83 faiz və 2,42 faiz azalma var. Mənzillərin kirayəsi bazarında azalma sentyabr ayında avqust ayı ilə müqayisədə dollarla ifadədə 8 faiz, manatla ifadədə isə 9,4 faiz təşkil edib. Kommersiya obyektlərinin kirayə bazarında isə müvafiq göstəricilər 4,28 faiz və 2,73 faiz azalma təşkil edib".
Günel CƏLİLOVA
