Pərviz Heydərov: "Bəlli bir müddətdən sonra..."
Cari ilin yanvar-sentyabr aylarında Azərbaycanda iqtisadi və sosial sahələrin inkişafı üçün bütün maliyyə mənbələrindən əsas kapitala 10 268,7 mln. manatlıq vəsait yönəldilib. Dövlət Statistika Komitəsinin verdiyi məlumata görə, bu da ötən ilin eyni dövrü ilə müqayisədə 13,2 faiz azdır.
Bu vəsaitin 71,2 faizi tikinti-quraşdırma işlərinin yerinə yetirilməsinə sərf edilib. İstifadə olunmuş vəsaitin 80,2 faizi məhsul istehsalı obyektləri, 15,5 faizi xidmət sahələri üzrə obyektlər, 4,3 faizi isə ümumi sahəsi 1 205,5 min kv.metr olan yaşayış evlərinin tikintisinə sərf olunub.
Rəsmi statistikaya əsasən, daxili mənbələrdən əsas kapitala yönəldilmiş vəsait ümumi sərmayənin 39,1 faizini təşkil edib.
Aydın məsələdir ki, neft gəlirlərinin azalması sərmayə qoyuluşuna öz təsirini göstərib. Bu təkcə Azərbaycanda deyil, digər bir sıra ölkələrdə də müşahidə olunan tendensiyadır. Ancaq bütün bunlara rəğmən, iqtisadi böhran şəraitində investisiya qoyuluşunun 13 faiz azalması elə də böyük rəqəm deyil.
Sözügedən məsələni dəyərləndirən iqtisadçı-ekspert Pərviz Heydərovun fikrincə, bir sıra işlərin görülməsi öz müsbət effektini verə bilər: "Məlumdur ki, dövlətimizin maliyyə imkanları əvvəlki kimi deyil. Neftin qiymətinin 2 dəfədən çox enməsilə əlaqədar olaraq maliyyə vəsaitlərinə qənaət etmək məcburiyyəti yaranıb. Həmçinin, dövlət investisiya xərcləri də azaldılıb. Bir sözlə, bütün istiqamətlərdə maliyyə vəsaitlərinin xərclənməsində səmərəliliyi artırmaq bir nömrəli vəzifə olaraq qarşıya qoyulub. İcra hakimiyyəti orqanlarının və dövlət büdcəsindən maliyyələşən təşkilatların fəaliyyətində satınalmaların səmərəliliyinin artırılması ilə bağlı əlavə tədbirlər haqqında fərman da məhz bu zərurətdən irəli gəlib. Sənəddə də qeyd olunub ki, icra hakimiyyəti orqanlarının və dövlət büdcəsindən maliyyələşən təşkilatların fəaliyyətində səmərəliliyi artırmaq, ölkədə sahibkarlıq fəaliyyətini genişləndirmək, habelə biznes və investisiya mühitinin əlverişliliyini və rəqabət qabiliyyətini daha da artırmaq məqsədi fərmanın əsas qayəsini təşkil edir. İcra hakimiyyəti orqanları və dövlət büdcəsindən maliyyələşən təşkilatlar tərəfindən idxal mallarının (işlərinin, xidmətlərinin) satın alınması 2018-ci il 1 yanvar tarixinədək dayandırılır. Bütün bunlar bəlli bir müddətdən sonra müsbət effekt verə bilər". Vidadi ORDAHALLI
