Qulu İsmayılov: "Elə bilirəm ki, tədbirdə iştirak edən ölkələr Səttar Mehbalıyevin təklifinə müsbət cavab verəcək"
Oktyabrın 13-də Türkiyənin İstanbul şəhərində "Məmur-Sen" Türkiyə Həmkarlar İttifaqları Konfederasiyası ilə Sosial, İqtisadi və Sosial Araşdırmalar və İslam Ölkələri üzrə Təlim Mərkəzinin (SESRİC) "İslam dünyasında həmkarlar ittifaqları" mövzusunda birgə təşkil etdiyi beynəlxalq simpozium işə başlayıb. Tədbir İslam Əməkdaşlıq Təşkilatına daxil olan ölkələrin həmkarlar ittifaqları arasında interaktiv forum mahiyyəti daşıyır.
Azərbaycan Həmkarlar İttifaqları Konfederasiyasından (AHİK) bildiriblər ki, oktyabrın 17-dək davam edəcək simpoziumun əsas məqsədi islam ölkələrində həmkarlar ittifaqına dair təcrübə və biliklərin bölüşülməsi və gələcəkdə iştirakçılar arasında davamlı əməkdaşlıq və birgə layihələr yaratmaqla ümumi problemləri həll edəcək yolların müzakirəsidir.
Tədbirə qatılan Azərbaycan Həmkarlar İttifaqları Konfederasiyasının sədri Səttar Mehbalıyev çıxışında bildirib ki, müsəlman ölkələrini öz ətrafında birləşdirən, beynəlxalq münasibətlər sistemində xüsusi çəkiyə malik olan İslam Əməkdaşlıq Təşkilatı müsəlman ölkələrinin uğurlu birlik modeli kimi artıq özünü təsdiq edib, üzv dövlətlər arasında qarşılıqlı faydalı əlaqələrin, siyasi, iqtisadi və mədəni əməkdaşlığın genişlənməsinə, islam həmrəyliyinin güclənməsinə və xalqların mənafelərinin qorunması işinə mühüm töhfələr verib: "Dünyada, o cümlədən bir çox müsəlman ölkəsində sabitliyə zərbə vuran müxtəlif neqativ proseslər, digər tərəfdən isə barışığı, sülh və əminamanlığı təcəssüm etdirən islam dini haqqında yanlış rəy formalaşdırmaq cəhdləri bizi narahat etməyə bilməz. Bütün ərəb dünyasını sarsıdan siyasi hadisələr, o cümlədən Fələstin xalqının milli müstəqillik uğrunda mübarizəsi, Suriyada hərbi əməliyyatlar, Ermənistanın Azərbaycana hərbi təcavüzü və digər bu kimi problemlər islam aləmində davamlı sülhün və təhlükəsizliyin təmin olunmasına, stabil inkişafa maneə yaradan, habelə səylərimizin vahid məqsəd uğrunda səfərbər edilməsini zərurətə çevirən ciddi faktorlardır. Təəssüf ki, Qərbin islamofob dairələri müsəlman dünyasında baş verən dəyişiklikləri birtərəfli və qərəzli formada təqdim edir. Nəticə etibarilə maddi və mənəvi zənginliyə malik olan müsəlman ölkələri, tolerant və multikultural xarakteri ilə seçilən müsəlman xalqları, həm də sülh və barışıq dini olan islam haqqında beynəlxalq ictimaiyyətdə qeyri-obyektiv və yanlış təsəvvür yaradılır. İslam ölkələrinin həmkarlar ittifaqlarının informasiya vasitələrində obyektivliyin və həmrəyliyin təmin edilməsi, bu məqsədlə KİV-lərin fəaliyyətinin əlaqələndirilməsi, aktual mövzularla bağlı forum və konfransların təşkili üçün belə tədbirlərin keçirilməsinə ehtiyac var. Mən müsəlman ölkələrinin həmkarlar ittifaqları arasında informasiya mübadiləsinin səviyyəsinin yüksəldilməsi, müsəlman dünyasının yüksək mənəvi dəyərlərinin daha effektli təbliği və digər məsələlərin uğurla həllinin təmin olunması üçün təklif edirəm ki, islam ölkələrinin həmkarlar ittifaqları təşkilatlarının vahid mərkəzi yaradılsın".
S.Mehbalıyevin islam ölkələri həmkarlar ittifaqlarının koordinasiyasını gücləndirməklə bağlı verdiyi təklifi necə dəyərləndirmək olar?
İqtisadçı Qulu İsmayılov qəzetimizə açıqlamasında bildirdi ki, Azərbaycanın islam ölkələrilə çox sıx münasibətləri mövcuddur: "Xüsusilə bu münasibət İslam Ölkələri Əməkdaşlıq Təşkilatı çərçivəsində daha yüksək səviyyədə davam edir. S.Mehbalıyev haqlı olaraq qeyd edib ki, bəzən müsəlman kimliyinə görə ölkələrə qarşı ayrıseçkiliyə yol verilir. Bu səbəbdən də deyilən arealı əhatə edən ölkələrin bir birlik modelinin yaradılmasına böyük zərurət var. Həmkarlar təşkilatları istənilən ölkənin həyatında mühüm rol oynayır. Bu baxımdan da təklif olunan modelin ərsəyə gəlməsi istənilən sahədə öz müsbət töhfəsini vermiş olacaq. Elə bilirəm ki, tədbirdə iştirak edən ölkələr S.Mehbalıyevin təklifinə müsbət cavab verəcək".
Məhəmmədəli QƏRİBLİ
