Əkrəm Həsənov: "Əvvəllər banklarda çalışan lazımsız işçilərin sayı çox idi, böhran vaxtı həmin işçilər ixtisar olundu"
Bank sektorunda yaşanan vəziyyət hər kəsə bəllidir. Ard-arda bir neçə bank bağlandı, xırda bankların bəzisi birləşdirildi. Bəllidir ki, artıq 10 bankın fəaliyyətinə xitam verilib. Bankların və valyutadəyişmə məntəqələrinin bağlanması nəticəsində çoxlu sayda bank işçisi işsiz qalıb. İşsiz qalan bank işçiləri iş tapmaqda çətinlik çəkdiyini bildirir.
Hətta bir neçə gün öncə əmək və əhalinin sosial müdafiəsi naziri Səlim Müslümov media nümayəndələrinə açıqlamasında bildirib ki, bank-maliyyə sektorunda baş verən dəyişikliklərlə əlaqədar 2700 nəfər yerli məşğulluq mərkəzlərinə müraciət edib. Nazirin sözlərinə görə, son dövrdə bankların konsolidasiyası, o cümlədən bankların və valyutadəyişmə məntəqələrinin bağlanması bu sahədə çox sayda insanın işini itirməsinə gətirib çıxarıb: "Həmin insanlar işsiz kimi qeydiyyatdan keçib və onlara işsizlik müavinəti təyin olunub. Son səkkiz ayın məlumatına görə isə, banklarda orta aylıq əməkhaqqı çox yüksək, təxminən 1252 manatdır.
Nəzərə alsaq ki, bu məbləğin 70 %-i müavinət formasında ödənilməlidir, bu, Dövlət Sosial Müdafiə Fondunun büdcəsindən böyük məbləğin ayrılmasını tələb edir. Buna görə də bu il bu məqsədlə ayrılan 15 milyon manat kifayət etmir".
Bank işçilərinin işsiz qalması ilə bağlı fikir bildirən bank sektoru üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, işsizlik problemi aktual məsələdir: "İşsizlik tək bank sektorunda deyil, digər sahələrdə də yaşanır. Tək fəaliyyətinə xitam verilən banklar bağlanmır. Eyni zamanda, fəaliyyətdə olan banklar da filiallarının əksəriyyətini bağlayıb. Proses hələ davam edəcək. Təbii, digər sahələrdən fərqi odur ki, bankirlər rəsmi yüksək maaş alıb. Onlara həm müavinət vermək problemdir, həm də onlar üçün öyrəşdikləri maaşa uyğun yeni iş yeri tapmaq çətindir. Onu da qeyd etmək lazımdır ki, bank işçilərinin əksəriyyətinin ehtiyatı, əmlakı da var. Yəni digərlərindən fərqli olaraq müəyyən dövr ərzində özlərini dolandıra bilərlər. Amma bu halı bank işçilərinin hamısına aid etmək olmaz".
Həmsöhbətimiz onu da əlavə etdi ki, əksər banklarda işçi sayı həddindən artıq çox idi: "Banklarda çalışan lazımsız işçilərin sayı çox idi. Böhran vaxtı banklar həmin işçiləri azad etmək məcburiyyətində qaldı".
Ə.Həsənovun sözlərinə görə, 2700 bank işçisi işsiz qaldığı bir vaxtda xarici vətəndaşlar bizim banklarda çalışır: "Qanunvericiliyə əsasən, ölkədə iş axtaran yerli kadr olmasa, o zaman xarici işçilər çalışa bilər. Ancaq bizim banklarda xarici mütəxəssislər yetərincədir. Xarici işçilərə işləmək iznini Dövlət Miqrasiya Xidməti və Əmək və Əhalinin Sosial Müdafiəsi Nazirliyi verir. Əcnəbilərə işləmək razılığı isə birillik verilir. Maraqlıdır, bu qədər yerli işaxtaran işçilərimiz olduğu halda əcnəbilərə nə ehtiyac var? Bu yaxınlarda "Nikoil Bank"a yeni əcnəbi işçilər gəlir. Araşdırma aparılsa, bankların, demək olar ki, əksəriyyətində xaricilərin çalışdığını görmək olar. "AssesBank", "Nikoil Bank" və digər banklarda bu vəziyyət yaşanır".
Günel CƏLİLOVA
