Zakir Əhmədov: "Neftin qiyməti sabitləşsə, bu, öz növbəsində, enerji layihələrinin vaxtında təhvil verilməsində müsbət rol oynaya bilər"
23-cü Dünya Enerji Konqresi çərçivəsində İstanbulda Neft İxrac Edən Ölkələr Təşkilatına (OPEC) üzv ölkələrin nazirləri və Rusiyanın nümayəndələri qeyri-rəsmi görüş keçirib.
Görüşdə OPEC-in sentyabrın 26-28-də Əlcəzairdə keçirilən qeyri-rəsmi toplantısında müzakirə etdiyi istehsalın miqdarının məhdudlaşdırılması məsələsi kartelə üzv olmayan ölkələrlə müzakirə edilib.
Yığıncaqda OPEC-in baş katibi Məhəmməd Barkindo, Qətər dövlətinin energetika və sənaye naziri Məhəmməd bin Saleh Əl-Sada, Əlcəzairin enerji naziri Nurəddin Butarfe, Venesuelanın neft və dağ-mədən sənayesi naziri Euloqio del Pino, Rusiyanın energetika naziri Aleksandr Novak və Meksikanın hidrokarbonlar nazirinin müavini Aldo Flores-Quiroqa iştirak edib. Görüşdə Səudiyyə Ərəbistanı ilə yanaşı, Əlcəzairdəki yığıncaqda nəzərdən keçirilən hasilatın azaldılması ilə bağlı qərara müsbət reaksiya verən OPEC-ə üzv İran və İraqın nümayəndələri iştirak etmir. Qapalı keçirilən yığıncaqdan sonra müzakirələrə dair açıqlama verilməsi gözlənir.
Toplantıdan sonra Rusiyanın energetika naziri Aleksandr Novak bildirib ki, Vyana toplantısı ərəfəsində İstanbulda keçirilən görüş çox faydalıdır: "Sentyabrda Əlcəzairdə keçirilən toplantıdan sonra neftin hasilatı ilə bağlı önəmli dəyərləndirmələr etdik. Bazarın digər önəmli oyunçularını, xüsusilə də ABŞ-ı oktyabrın 29-da Vyanada keçiriləcək toplantıda görmək istərdik".
Bundan başqa, OPEC-in baş katibi Məhəmməd Barkindo deyib ki, neftlə bağlı məsələlərin müzakirəsi mümkündür. Bu nə deməkdir?
Məsələyə münasibət bildirən ekspert Zakir Əhmədovun sözlərinə görə, görünür, tərəflər neftlə bağlı ortaq məxrəcə gəlmək istəyir: "Məsələ ondadır ki, 2014-cü ilin ortalarından neftin qiymətində müşahidə olunan ucuzlaşma səngimək bilmir. O vaxtdan neft xeyli ucuzlaşıb və bu ucuzlaşma davamlı hal alıb. Bundan həm OPEC üzvü olan dövlətlər, həm də üzv olmayan digər dövlətlər iqtisadi baxımdan itirir. Ancaq ixracla bağlı ölkələr arasında kvotanın müəyyən olunmasına gəldikdə isə, tərəflər arasında mövcud fikir ayrılıqları ortaq məxrəcə gəlməyə imkan vermir. O üzdən, güman olunur ki, OPEC müzakirələri davam etdirməklə müəyyən nəticənin əldə olunmasına çalışır. Nəzərə almaq lazımdır ki, 23-cü Dünya Enerji Konqresi çərçivəsində Rusiya ilə Türkiyə arasında "Türk axını" barəsində razılıq əldə olundu. Neftin qiyməti sabitləşsə, bu, öz növbəsində, enerji layihələrinin vaxtında təhvil verilməsində müsbət rol oynaya bilər".
Vidadi ORDAHALLI
