Ruslan Atakişiyev: "Dünya bazarında nə qədər çox məhsul sata bilsək, o qədər gəlirlərimiz artmış olacaq"
"Yerli xammalı satışa deyil, istehsalata yönəltməliyik". Bunu Azərbaycan Prezidenti İlham Əliyev Nazirlər Kabinetinin 2016-cı ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında deyib.
Dövlət başçısı iqtisadiyyatın və sənaye potensialının artdığını bildirib: "Sənayemizin qeyri-neft sektoru 3,6 faiz artıb. Kənd təsərrüfatı 2,4 faiz artıb və əminəm ki, daha da artacaq. Çünki kənd təsərrüfatı sahəsində apardığımız işlər yaxın gələcəkdə daha da böyük həcmdə nəticə verəcək".
Prezident İlham Əliyev ölkədə süni qiymət artımının qarşısının alınması və idxaldan asılılığın minimuma endirilməsi ilə bağlı tapşırıqlar verib. Dövlət başçısı bildirib ki, ölkədə sənayenin inkişafı və qeyri-neft sektorunun tərəqqisinə mühüm töhfə olacaq sənaye parklarının yaradılması istiqamətində tədbirlər davam etdirilməlidir: "Pirallahı rayonunda dərman istehsalı zavodunun tikilməsi, Masallıda sənaye zonasının yaradılması, Neftçalada avtomobil zavodunun inşası ilə bağlı tədbirlər davam etdirilir. Sosial mənzillərin tikintisi başlayır və yaxın gələcəkdə böyük metallurgiya kompleksinin inşası planlaşdırılır".
Gələn ilin dövlət büdcəsinin yenə də sosialyönümlü olmasının vacibliyini vurğulayan Prezident, bununla belə, investisiya yönümlü layihələrin icrasının da diqqət mərkəzində saxlanmasının zəruriliyini qeyd edib.
Bütövlükdə yerli xammalı istehsalata yönəltmək üçün nə etmək lazımdır? Sözügedən məsələni dəyərləndirən İqtisadi Resursların Öyrənilməsi Mərkəzinin sədri Ruslan Atakişiyevin fikrincə, bunun üçün bir sıra işlər görülməlidir: "İndiyə qədər bununla bağlı bir sıra işlər görülüb. Əsas məqsəd ölkədə qeyri-neft sektorunun inkişaf etdirilməsi və sonda qeyri-neft sektorunun hesabına ümumdaxili məhsulun artırılmasıdır. Tütünçülüyün, pambıqçılığın və digər sahələrin inkişafı məsələsində sahibkarların üzərinə böyük məsuliyyət düşür. İqtisadi sistemdə üç prinsip var - kim üçün, nə və necə istehsal etmək. Məhsulumuzu dünya bazarında sata bilmiriksə, sonda istehsal obyekti zərərlə işləyib bağlanmalı olacaq. Amma bazarlarımızı müəyyənləşdirsək, inkişaf əldə edə bilərik. Ən azından alıcılarımızın istehlak həcmini bilməliyik və ona uyğun da istehsalı təşkil etməliyik. Bu prinsiplərə riayət olunduğu halda açılan istehsal obyektlərində istehsal edilən məhsullar bazarda öz yerini tuta biləcək. Məhsulların gəlirləri nəticəsində ümumilikdə sahibkarlıqla yanaşı, ölkəyə daxilolmaların, qeyri-neft sektorunun həcminin artması da gözlənir. Sonda ümumdaxili məhsulda da artım tempini müşahidə etmək olar. Yəni, istənilən halda, həyata keçirilən tədbirlərin effektivliyi məhsuldan gələn gəlirdən asılıdır. Məqsəd anbarlarda olan məhsulların satılmasıdır. Dünya bazarında nə qədər çox məhsul sata bilsək, o qədər gəlirlərimiz artmış olacaq".
Vidadi ORDAHALLI
