"Ölkəmizin ixrac imkanları genişdir və müəyyən bazarları var"
Rəşad Həsənov: "Prioritet olaraq bu istiqamətdə əsasən kənd təsərrüfatı və nəqliyyat sahəsi gəlir gətirir"
"Bizə valyuta gətirən kənd təsərrüfatı sahələrinin inkişafı lazımdır". Bunu Prezident İlham Əliyev Nazirlər Kabinetinin 2016-cı ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında deyib.
Dövlət başçısı bununla bağlı bir sıra sahələrin adını çəkib: "Onların arasında fındıqçılığın çox böyük potensialı var. Bizə ən çox valyuta gətirən kənd təsərrüfatı məhsullarından biri fındıqdır. Yeni təkliflər hazırlanır. Qırx min hektarda yeni fındıq bağları salınmalıdır. Mövcud fındıq bağlarının həcmi ondan azdır. Ona görə biz fındıq bağlarını 2 dəfədən çox artıracağıq. Fındığı yetişdirmək üçün 12 rayon seçilib. İqlimi və torpağı münbit olan bu 12 rayonda fındıqçılıq çox ciddi şəkildə inkişaf etməlidir. Bunun özəl sektor üçün də çox böyük faydası var".
Dövlət başçısı onu da qeyd edib ki, Abşeron yarımadasında ənənəvi badam bağları azalır: "Ancaq bu da çox valyuta gətirən bir sahədir. Mənə verilən məlumata görə, bizdə cəmi 500-600 hektar badam bağları var. Bu çox azdır. Minlərlə hektar badam bağları salınmalıdır. İndi bu ərazilərdə boş torpaq sahələri çoxdur. Biz torpaqlardan səmərəli şəkildə istifadə etməliyik və xüsusilə Bakının, Sumqayıtın ətrafında, Abşeronda böyük badam plantasiyaları salınmalıdır. Biz zeytun idxal edirik. İndi bizim o qədər zeytun ağaclarımız, o qədər imkanlarımız var. Həm Bakıda, Abşeronda, həm də digər yerlərdə bizim çox böyük imkanlarımız var".
Valyuta gətirən kənd təsərrüfatı sahələrinin inkişaf etdirilməsi ölkənin qeyri-neft sektorunun inkişafı baxımından mühüm əhəmiyyət kəsb edir. Bu həm də ölkənin dayanıqlı inkişafını təmin edir.
İqtisadçı-ekspert Rəşad Həsənovun fikrincə, əsasən kənd təsərrüfatı ilə nəqliyyat sahəsinin hesabına həmin vəzifənin icrasına nail olmaq olar: "Ölkə iqtisadiyyatının diversifikasiyasının dəyərləndirilməsilə bağlı müəyyən araşdırmalar aparmışıq. Bu zaman aydınlaşıb ki, xüsusilə ixracyönümlü müqayisəli üstünlüyə malik olan qeyri-neft sektoru sahəsi kənd təsərrüfatı, nəqliyyat sektorlarıdır. Ölkə daxilində turizmin genişləndirilməsi imkanları var. Habelə yüngül, yeyinti sənayesinin ixrac potensialı daha üstün qiymətləndirilir. Amma prioritet olaraq bu istiqamətdə əsasən kənd təsərrüfatı və nəqliyyat sahəsi gəlir gətirir. Bu istiqamətdə müəyyən təşviqedici addımların atılması, həmçinin, istehsal imkanlarının liberallaşdırılması gərəkdir. İxracın təşviqi ilə bağlı müəyyən proqramlar hazırlanmalıdır. Bununla bağlı ölkə rəhbəri tərəfindən fərman imzalanıb. Eyni zamanda, burada yüngül və yeyinti, habelə neft-kimya sənayesi də Azərbaycanda nisbətən rəqabət qabiliyyətli sahələrdən hesab olunur. Bu istiqamətlərdə ölkəmizin ixrac imkanları genişdir və müəyyən bazarları var. Əsasən də aqrar sektorda Rusiya kifayət qədər tələb olunan bazardır. Sadaladığım sahələrə diqqətin artırılması ixrac potensialımızın artmasına gətirib çıxaracaq".
Vidadi ORDAHALLI
