Xəyal Məmmədxanlı: "İşsizlik sığortası o ölkələrdə yüksək şəkildə tətbiq olunur ki, orada işsizlik səviyyəsi azdır, işlə təmin olunma qısa müddət ərzində baş verir"
Azərbaycanda "İşsizlərin icbari sığortası haqqında" qanunu tezliklə qəbul etmək lazımdır. İşsizlikdən sığorta sistemi ortada olmalı və hər kəs öz iş yerini sığortalamalıdır.
Bunu əmək və əhalinin sosial müdafiəsi naziri Səlim Müslümov jurnalistlərə müsahibəsində deyib. Nazir bildirib ki, hazırda qanun layihəsi bütün müvafiq instansiyalarda artıq ekspertizadan keçib. Maliyyə Nazirliyi rəy bildirməlidir, daha sonra bu qanun layihəsi Nazirlər Kabinetinə təqdim olunacaq.
İşsizlik sığortasının qəbulunun əhəmiyyətindən danışan sığorta sahəsi üzrə ekspert Xəyal Məmmədxanlı "Bakı-Xəbər"ə açıqlamasında qeyd etdi ki, bu qanun icbari sığorta növlərindən biri olacaq: "Hazırda bəzi sığorta şirkətlərində könüllü halda işsizlik sığortası icra olunur. Dünyanın əksər ölkələrində də işsizlik sığortası haqqında qanun var".
Ekspertin fikrincə, hazırda Azərbaycanda işsizlik hallarından sığorta risqi böyükdür. Bu səbəbdən də əksər sığorta şirkətləri könüllü şəkildə işsizlik sığortasını aparmaqda maraqlı deyil: "İşsizlik sığortası o ölkələrdə yüksək şəkildə tətbiq olunur ki, orada işsizlik səviyyəsi azdır, işlə təmin olunma qısa müddət ərzində baş verir. İşsizliyə görə ödənilən sığorta məbləği isə kifayət qədər yüksəkdir. Həmin məbləğlə vətəndaş 3-5 ay normal şəraitdə yaşaya bilər. Ancaq Azərbaycanda isə bu faktorlar heç bir sığorta şirkətini qane etmədiyinə görə onlar könüllü şəkildə bununla məşğul olmaq istəmir. İcbari şəkildə bu məsələ qanun olaraq qəbul olunsa, bunun müsbət nəticələri yaranar. İşsiz vətəndaşlar işlə təmin olunana qədər həmin sığorta məbləği ilə müəyyən müddət dolana bilər".
Həmsöhbətimizin fikrincə, belə bir qanun qəbul edilsə, bunun sosial durumu ağır olan ailələrə müsbət təsiri olar.
Günel CƏLİLOVA
