İlham Şaban: "Dövlət Neft Şirkəti xarici meqa şirkətlərin bənzərində inkişaf edir"
SOCAR 2023-cü ilə qədər Türkiyənin enerji sektoru üçün lazımi investisiya qoyuluşunun 20 faizini həyata keçirəcək.
Bunu İstanbuldakı 23-cü Dünya Enerji Konqresində iştirak edən SOCAR prezidenti Rövnəq Abdullayev jurnalistlərə açıqlamasında deyib: "Türkiyənin hədəflərinə görə, 2023-cü ilə qədər bu ölkənin enerji sektoruna investisiya qoyuluşu 100-120 milyard dollara çatmalıdır. SOCAR 18 milyard dollar investisiya ilə bunun 20 faizini təmin edəcək".
R.Abdullayevin sözlərinə görə, dünyanın tələbatı dəyişir və enerji sektoru da bu dəyişikliyə operativ cavab verməlidir.
Dövlət Neft Şirkətinin rəhbəri deyib ki, SOCAR Türkiyə iqtisadiyyatında investisiya qoyuluşuna davam edəcək.
Eyni zamanda R.Abdullayev xatırladıb ki, neftin qiyməti düşəndə bəzi şirkətlər enerji layihələrinin reallaşdırılmasını dayandırdı. Ancaq SOCAR, əksinə, 45 milyardlıq "Cənub Qaz Dəhlizi" layihəsini dayandırmadı: "Son 30 ilin ən böyük xarici investisiya yatırımı olaraq STAR neft emalı zavodunu inşa edirik və bu layihə başa çatmaq üzrədir. Bu zavod Türkiyəyə idxalda milyardlarla dollar qənaət etməyə imkan verəcək".
R.Abdullayev onu da əlavə edib ki, SOCAR öz fəaliyyətini yalnız neft-qazla məhdudlaşdırmır, TANAP boyu fiberoptik kabel çəkilməsi, külək stansiyasının tikilməsi kimi digər layihələri də həyata keçirir.
Ümumilikdə sözügedən addımın fonunda, bu, dünyanın enerji təhlükəsizliyində Azərbaycanın nə kimi xidməti sayılır? Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, Azərbaycan bundan əvvəlki 10 illikdə ancaq özünün daxili bazarında layihələr həyata keçirirdisə, indi həm də xarici bazarda layihələr həyata keçirir: "Artıq növbəti illərdə ümumiyyətlə inkişaf perspektivləri Azərbaycanın sərhədlərini aşmaq istiqamətində götürülüb. Bu da başadüşüləndir. Ona görə ki, Dövlət Neft Şirkəti xarici meqa şirkətlərin bənzərində inkişaf edir. Hasilatdan, kəşfiyyat işlərindən, satışdan, emaldan tutmuş, biznesin bütün strukturlarında özünün yerini tapıb. Bunu da o baxımdan edir ki, biznesin bütün strukturlarında ölkəyə fayda gəlsin. Yəni Azərbaycanın daxili bazarında neftin, karbohidrogenlərin get-gedə artıq pik həddən aşağı düşdüyü şəraitdə özünün gəlirlərini ölkənin xarici bazarlarında formalaşdıra bilsin. Eyni zamanda, qoruyub saxlaya bilsin. Bu o deməkdir ki, Türkiyənin enerji sektoruna qoyulan investisiyalar gələcəkdə Azərbaycana gəlir gətirməyə başlayacaq. Bu da, öz növbəsində, ölkənin sabit və dayanıqlı inkişafını təmin edəcək. Görülən işlər dünyanın enerji təhlükəsizliyinə töhfə verməklə yanaşı, Azərbaycan üçün də faydalıdır".
Vidadi ORDAHALLI
