İldırım Qurbanov: "İş adamı bankı həm də maliyyə məsləhətçisi kimi tanımalıdır"
"Bank sektorunda islahatlar, konsolidasiya siyasəti davam etdirilməlidir". Xəbər verildiyi kimi, bunu Azərbaycan Prezidenti İlham Əliyev Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında yekun nitqi zamanı deyib: "Bank sektorunda çox ciddi islahatlar aparılmalıdır. Bank sektoru şəffaf olmalıdır və ən yüksək dünya standartlarına cavab verməlidir".
Reallıq ondan ibarətdir ki, devalvasiyadan sonra bağlanan 13 bankın ardınca digərləri də eyni aqibəti yaşamaq istəmirsə, sınaq dövründə reformalara getməyə məhkumdur. Sadalanan məqamlar bank sektorunda islahatların sürətləndirilməsinə hesablanıb. Ölkə başçısının banklara yönəlik mesajları onları islahatları sürətləndirməyə istiqamətləndirir. Bundan sonra banklar islahatlara getməsə, əhaliyə kredit ödənişlərində güzəşt olunmasa, faizlər aşağı salınmasa, bağlanan bankların sayının 30-a çatacağı şübhəsizdir. İkinci devalvasiya dalğasından sonra hökumətin proseslərə ciddi müdaxilə etməsi, antiböhran tədbirlərinin həyata keçirilməsi ölkənin maliyyə bazarında müəyyən sakitlik yaradıb. Ancaq bu prosesin davamlı olması üçün, görünür, daha çox iş görülməlidir. Maraqlıdır, bəs ekspertlər bunu necə dəyərləndirir? Prezident bank sektorunda çox ciddi islahatlar aparılmalıdır deyərkən nəyi nəzərdə tutur?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun sözlərinə görə, burada söhbət bank sektorunun real sektora vəsait ayırmasından gedir: "Yəni biznes mühitinin, biznes fəaliyyətinin inkişafı üçün həmin obyektlərə bankların kredit ayırması vacibdir. Onların fəaliyyətinə təkan vermək üçün bu vacib şərtdir. Dəfələrlə bu məsələyə toxunulub. Görünən odur ki, dövlət başçısı bu işdə daha qətiyyətli mövqe ortaya qoyur. Çünki bazar iqtisadiyyatı şəraitində əsasən real iqtisadiyyatın inkişafına vəsait ayrılmalıdır ki, bu sahədə canlanma olsun. İslahatlar deyərkən burada söhbət həm də ondan gedir ki, banklar biznes adamları üçün maliyyə məsləhətçisi olmalıdır. Yəni hər hansı bir biznes adamı kredit götürəndə onun biznes planının tərtibinə, vəsaitlərin təyinatına uyğun xərclənməsinə nəzarət etməlidir. Bu yöndə monitorinq fəaliyyətini gücləndirməlidir. İş adamı bankı həm də maliyyə məsləhətçisi kimi tanımalıdır. Bax söhbət bu kimi məsələlərdən gedir".
Vidadi ORDAHALLI
