Rəsul Cahangirli: "Prezidentin bunu xüsusi olaraq vurğulaması onun ölkə iqtisadiyyatının gücünə əmin olmasından irəli gəlir"
"Azərbaycan 2016-cı ili də uğurla başa vuracaq, 2017-ci il də uğurlu olacaq". Bunu Prezident İlham Əliyev oktyabrın 7-də Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxışı zamanı deyib.
Dövlət başçısı çıxışında vurğulayıb ki, gələn il inflyasiya birrəqəmli olmalıdır: "Biz, həmişə olduğu kimi, sosial infrastruktur layihələrinə böyük diqqət göstərməliyik. 2017-ci ildə biz makroiqtisadi sabitliyə ciddi fikir verməliyik. İnflyasiya birrəqəmli olmalıdır. Hesab edirəm ki, biz bunu təmin edəcəyik. Bir sözlə, artıq 2016-cı il sona yaxınlaşır. Qeyd etdiyim kimi, bu il dünya iqtisadiyyatı üçün, dünya üçün ağır il olmuşdur. Ancaq əminəm ki, Azərbaycan son üç ay ərzində görüləcək işlər nəticəsində 2016-cı ili də uğurla başa vuracaq. 2017-ci il də uğurlu olacaq. Əminəm ki, qarşıya qoyulan bütün vəzifələri icra etmək üçün bizdə kifayət qədər iradə, güc var. Xalq bizim siyasətimizi dəstəkləyir, referendumun nəticələri bunu bir daha təsdiqləyir. Bizim yolumuz açıqdır. Biz bundan sonra da inkişaf və tərəqqi yolu ilə gedəcəyik".
Məsələyə münasibət bildirən ekspert Rəsul Cahangirlinin sözlərinə görə, gələn il inflyasiyanın birrəqəmli həddə saxlanması ehtimalı böyükdür: "Prezidentin bunu xüsusi olaraq vurğulaması onun ölkə iqtisadiyyatının gücünə əmin olmasından irəli gəlir. Məsələ ondadır ki, gələn il ölkədə inflyasiyanın 7-8 faiz olacağı proqnozlaşdırılır. Məlum səbəblər üzündən gələnilki büdcədə neftin 1 barreli 40 dollardan götürülüb. Neft amilindən asılılığın azalması inflyasiyanın aşağı səviyyədə qalmasına öz təsirini göstərir. Digər tərəfdən, dövlət büdcəsi 10 milyard 400 milyon manat olacaq. Bu da əvvəlki illərlə müqayisədə azdır. Büdcənin az olması inflyasiyanın az olacağı anlamına gəlir. Nəzərə almaq lazımdır ki, gələn il iri infrastruktur layihələrinin həyata keçirilməsi üçün böyük vəsait nəzərdə tutulmayıb. Adətən bu kimi böyük layihələr inflyasiyanın səviyyəsinə öz təsirini göstərir. Belə layihələr olanda, istər-istəməz, inflyasiya təzyiqləri artır. O baxımdan hesab edirəm ki, gələn il inflyasiyanı birrəqəmli həddə saxlamaq mümkün olacaq".
Vidadi ORDAHALLI
