Samir Əliyev: "Əmanətçilər daha yüksək faiz əldə etmək üçün milli valyutada depozit yatırmağa üstünlük verir"
Bu ilin may-iyun-iyul aylarında əhalinin banklara yerləşdirdiyi əmanətlərin həcmində artım tendensiyası müşahidə olunur. Fins.az-ın araşdırmasına görə, avqustun 1-dək əhalinin banka qoyduğu əmanətlərin həcmi 7931,9 milyon AZN təşkil edib. 01.06.2016-cı ilə olan analoji rəqəm 7 565,9 milyon AZN olub. Aylar arasında ən böyük artım iyun-iyulda olub. Belə ki, əmanətlərin həcmi 7 565,9 milyon AZN-dən 7 815,6 milyon AZN-ə yüksəlib.
Qeyd edək ki, 2015-ci ilin dekabr devalvasiyasından sonra bank sektorunda ardıcıl olaraq başlanan mənfi tendensiyalar əhalinin bank sektoruna inamını azaltdı, eyni zamanda, ölkədə investisya mühitinin zəifləməsinə səbəb oldu. Bunu əmanətlərin həcmində də görmək mümkün idi. Ancaq hazırda əmanətlərin həcminin artması tendensiyası müşahidə olunur. Əhalinin pul gəlirlərinin azaldığını və yaşayış meyarlarından biri olan ərzaq zənbilinin bahalaşmasını nəzərə alsaq, əmanətlərin artması maraq doğurur.
İqtisadçı-ekspert Samir Əliyev "Bakı-Xəbər"ə açıqlamasında qeyd etdi ki, hazırda manat əmanətlərinin azalması prosesi yaşanır. Bunun səbəbi isə əhalinin milli valyutaya inamının azalmasıdır: "Ola bilsin ki, hansısa aylarda banklara qoyulan əmanətlərin artımı müşahidə olunsun. Bu artım isə ümumi tendensiyanı göstərmir. Hazırkı vəziyyət əmanətlərin azalmasına doğru gedir. Manata etibar bərpa olunmadığı üçün əhali əllərində olan vəsaiti dollara çevirərək əmanət kimi yatırır".
Ekspert əmanətlərin artımının məzənnə ilə bağlı olduğunu bildirdi. Onun sözlərinə görə, Mərkəzi Bankın rəsmi saytında əmanətlərin həcmi manatla göstərilir: "Yəni dollarla yatırılan əmanətlər belə manat formasında göstərilir. Dollar əmanəti manata çevriləndən konkret tarixə olan məzənnə ilə qeyd olunur".
S.Əliyevin sözlərinə görə, əmanətlərin artımı qısa müddət ərzində müşahidə oluna bilər: "Nəzərə almaq lazımdır ki, manatla yatırılan əmanətlərin faizi dollara nisbətən daha yüksəkdir. Ola bilsin ki, əmanətçilər daha yüksək faiz əldə etmək üçün milli valyutada depozit yatırmağa üstünlük verir. Onu da unutmaq lazım deyil ki, bankların bağlandığı bir dövrdə yüksək məbləğdə əmanət artımını müşahidə edə bilmərik".
Günel CƏLİLOVA
