Rəşad Həsənli: "Çoxuşaqlı ailələrə dəstək olmaq üçün onlara torpaq sahəsinin ayrılması vacibdir"
"Çoxuşaqlı ailələrə ev tikmək məqsədilə torpaq sahələri vermək zəruridir". Bu təklifi Milli Məclisin Səhiyyə komitəsinin üzvü, millət vəkili Musa Quliyev media nümayəndələrinə açıqlamasında deyib.
Millət vəkilinin sözlərinə görə, 4 və daha çox uşağı olan ailələrə, harada yaşamasından asılı olmayaraq, mənzil tikilməsi üçün növbəsiz və rüsumsuz torpaq sahəsi verilməsi məqsədəuyğun olardı: "Bu bir təklifdir. Milli Məclisin plenar iclasında irəli sürmüşük.
Məsələ ilə bağlı qanun o zaman qəbul edilə bilər ki, buna sosial sifariş olsun. Artıq niyyət və ideya ortadadır. Hesab edirəm ki, həqiqətən də 4 və 5, daha çox uşağı olan ailələrə ev tikmək üçün torpaq sahələri ayrılmalıdır. Dünya təcrübəsində də belə hallar mövcuddur. Çoxuşaqlı ailələrə dövlət qayğısı hər zaman olmalıdır. Çünki ailədə böyüyən 4 və 5 uşaq gələcəkdə hərəsi bir ailə başçısı olacaq. Onlara torpaq sahələri verilməlidir ki, ev tikib içinə yığışa bilsinlər. Sadəcə olaraq bu məsələdə dövlət öz xoş niyyətini ortaya qoymalıdır".
Məsələ ilə bağlı fikir bildirən iqtisadçı-ekspert Rəşad Həsənli qəzetimizə açıqlamasında qeyd etdi ki, çoxuşaqlı ailələrə dəstək olmaq üçün onlara torpaq sahəsinin ayrılması vacibdir. Onun sözlərinə görə, əcnəbi ölkələrdə çoxuşaqlı ailələrə müxtəlif formada yardım göstərilir: "Çoxuşaqlı ailələrdə hər uşağa görə verilən müavinətin həcmi yüksək olur və ailənin normal yaşaması üçün boş torpaq sahəsi ayrılır. Belə bir addımın atılmasında məqsəd əhalinin sayının artırılmasıdır".
İqtisadçının sözlərinə görə, belə bir təklifin irəli sürülməsi son zamanlar ölkədə çoxuşaqlı ailələrin sayının azalması ilə bağlıdır: "Azərbaycanda çoxuşaqlı ailələrə dövlət dəstəyinin artırılmasına ehtiyac var. Bəlli olduğu kimi, bu istiqamətdə dövlət dəstəyi kifayət qədər məhduddur. Uşaqpulu və ya birdəfəlik müavinətin məbləği olduqca azdır. Eyni zamanda, ailənin sosial vəziyyətinin təmin olunması ilə bağlı ayrılan xərclər məhdud həcmdədir. Belə bir vəziyyətdə çoxuşaqlı ailələrə torpaq sahəsinin verilməsi yaxşı olar. Regionlarda yaşayan çoxuşaqlı ailələrə boş torpaq sahəsinin verilməsi mümkün görünə bilər. Çünki şəhərlərə nisbətən rayon yerlərində çox uşağın olmasına üstünlük verilir. Ancaq şəhərdə yaşayanlar bir və ya iki uşağa üstünlük verir. Əhalinin sayının artırılması üçün şəhər yerləri üçün mexanizm hazırlanmalıdır. Yaxşı olar ki, yenicə yaradılmış Dövlət İnşaat Agentliyi tərəfindən tikilən binalardakı mənzillər paytaxt ərazisində yaşayan çoxuşaqlı ailələrə güzəştli şərtlərlə verilsin".
Ekspert hesab edir ki, çoxuşaqlı ailələrə dövlət dəstəyinin göstərilməsi əhalinin tərkibinə müsbət təsir göstərər.
Günel CƏLİLOVA
