Günel Fərhadqızı: "Hesab edirəm ki, yeni qaydalar Azərbaycanın da həmin ölkələrlə ticarət əlaqələrinin inkişafına kömək edəcək"
Rusiya və Türkiyə arasında sərbəst ticarətlə bağlı müqavilə 2017-ci ilin sonunda imzalana bilər. Bunu Türkiyənin iqtisadiyyat naziri Nihat Zeybəkçi açıqlayıb. O deyib ki, tərəflər aparılan danışıqlarda iki ölkə arasında sərbəst ticarətlə bağlı müqavilənin 2017-ci ilin sonunda imzalana biləcəyi barədə razılığa gəlib. Tərəflər 4 illik orta müddətli proqramın həyata keçirilməsi barədə də razılığa gəlib. Bu barədə razılaşma Türkiyə və Rusiya Yüksək Əməkdaşlıq Şurasının yaxın vaxtlarda keçiriləcək iclası çərçivəsində imzalana bilər.
Qeyd edək ki, N.Zeybəkçi və Rusiya iqtisadi inkişaf naziri Aleksey Ulyukayev ikitərəfli ticari-iqtisadi əlaqələrin inkişafı haqqında birgə bəyannamə imzalayıb.
İmzalanacaq bu müqavilənin Azərbaycana üçün nə kimi təsiri olacaq?
İqtisadçı Günel Fərhadqızı qəzetimizə açıqlamasında bildirdi ki, sərbəst ticarət yaratmaq birbaşa iqtisadi məsələdir:
"Dünyada bunun bir neçə nümunəsi var. Məsələn, 1992-ci ildə Macarıstan, Polşa, Rumıniya, Slovakiya, Sloveniya və Çexiya azad ticarət haqqında Mərkəzi Avropa müqaviləsini imzalamışlar. Bu saziş 12 il qüvvədə qaldı. Həmin dövlətlər Avropa İttifaqına üzv olduqdan sonra azad ticarət zonasına ehtiyac qalmadı. ABŞ-ın Cənubi Koreya ilə oxşar müqaviləsi var.
1994-cü ildə isə ABŞ, Kanada və Meksikanın iştirak etdiyi Şimali Amerika Azad Ticarət Zonası (NAFTA) yaradılıb. Bu təşkilatda gömrük tariflərinin mərhələli şəkildə aradan qaldırılması, intellektual mülkiyyət hüququnun qorunması, sərmayələr üçün ümumi qaydaların hazırlanması, xidmət sahəsində liberallaşmanın gücləndirilməsi və iştirakçı dövlətlər arasında ticarət mübahisələrinin həll edilməsinin effektiv mexanizmlərinin yaradılması nəzərdə tutulub. İstər Rusiya, istərsə də Türkiyənin Azərbaycanla sıx bağlılığı var. Bu özünü daha çox ticarət sahəsində büruzə verir. Belə bir qərarın verilməsində məqsəd ticari-iqtisadi sahədə uzunmüddətli və mürəkkəb yaxınlaşma prosesini aparmaqdan ibarətdir. İki ölkə arasında belə güzəştlərin əldə olunmasının Azərbaycana heç bir ziyanı ola bilməz. Hesab edirəm ki, yeni qaydalar Azərbaycanın da həmin ölkələrlə ticarət əlaqələrinin inkişafına kömək edəcək. Çünki yenilik ölkələr arasında ticarət dövriyyəsinin artmasına səbəb olacaq ki, bu da Azərbaycan üçün əlverişlidir".
Məhəmmədəli QƏRİBLİ
