Zakir Əhmədov: "Vergilər Nazirliyinin bu təşəbbüsü təqdirəlayiqdir"
"Mal və ya xidmət alqı-satqısı ilə bağlı əməliyyatlardan vəsaitlərin offşorlarda və ya offşor olmayan, lakin daha aşağı vergilərin tətbiq edildiyi dövlətlərə köçürülməsi qiymət manipulyasiyaları vasitəsilə də reallaşdırılır. Göstərilənlər nəzərə alınaraq, ölkə başçısının sərəncamı ilə təsdiq edilmiş islahatlar çərçivəsində transfer qiymətlərinin tənzimlənməsi ilə bağlı qanunvericilik bazasının yaradılması nəzərdə tutulur".
Bu barədə Vergilər Nazirliyinin Beynəlxalq əməkdaşlıq və maliyyə institutlarında vergi monitorinqi Baş İdarəsinin Beynəlxalq əməkdaşlıq idarəsinin rəisi, eyni zamanda BMT-nin Vergi məsələlərində beynəlxalq əməkdaşlıq üzrə Ekspertlər Komitəsinin Azərbaycandan olan üzvü Ülvi Yusifov deyib.
Onun sözlərinə görə, Vergilər Nazirliyi bu sahədə beynəlxalq təcrübəni öyrənir: "Ölkə başçısının sərəncamı ilə müəyyənləşdirilmiş islahatların həyata keçirilməsi nəticəsində yaradılması nəzərdə tutulan və offşorlarda təsis edilmiş müəssisələrin iştirakı ilə müxtəlif sxem və strukturlardan istifadə edərək gəlirlərini Azərbaycan Respublikasında vergidən yayındıran şəxslərin müəyyənləşdirilməsinə xidmət edəcək mexanizmlərin, eləcə də transfer qiymətlərinin tətbiqi ilə bağlı qanunvericilik və inzibatçılıq prosedurlarının məqsədi bu cür halların qarşısının alınması və bu yollarla vergidən yayındırılan məbləğlərin qanunvericiliyə müvafiq qaydada vergiyə cəlb edilməsini və bununla da vergi daxilolmalarının artımını təmin etməkdən ibarətdir".
Nazirlik rəsmisi deyib ki, hazırda dünyanın 111 dövlətinin vergi orqanları ilə vergi məlumatlarının mübadiləsinə imkan verən beynəlxalq müqavilələr imzalanıb.
Bütün hallarda, Vergilər Nazirliyinin bu təşəbbüsünü ekspertlər necə dəyərləndirir?
Məsələyə münasibət bildirən ekspert Zakir Əhmədov buna müsbət prizmadan yanaşdı: "Vergilər Nazirliyinin bu təşəbbüsü təqdirəlayiqdir. Ona görə ki, bu kimi nəzarət tədbirləri nəticəsində büdcəyə müəyyən həcmdə vəsait daxil olacaq. Offşor zonalarda şirkət yaradıb vergidən yayınma halları bütün dünyanın problemidir. Uzun illərdir bir sıra dünya dövlətləri bununla bağlı müxtəlif vasitələrdən istifadə edir. Görünən odur ki, inkişaf etmiş dövlətlər belə hallara qarşı mübarizədə daha çox təcrübəyə malikdir. Təqdir olunası haldır ki, Azərbaycan da dünya təcrübəsini öyrənir. Bu, vergi gəlirlərinə müsbət təsir edəcək".
Vidadi ORDAHALLI
