Çingiz Fərəcov: "Tütünçülüyün inkişafı üçün dünyada məşhur olan tütün sortları Azərbaycan torpağında əkilməlidir"
Prezident İlham Əliyev Azərbaycan Respublikasında tütünçülüyün inkişaf etdirilməsinə dövlət dəstəyi haqqında Sərəncam imzalayıb. Sərəncamda deyilir: "Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, ölkədə tütünçülüyün inkişafına dövlət dəstəyini gücləndirmək, bu sahənin potensial imkanlarından səmərəli istifadə etmək, rəqabət qabiliyyətini yüksəltmək və tütün istehsalı ilə məşğul olan əhalinin sosial rifahını daha da yaxşılaşdırmaq məqsədilə qərara alıram:
1. Müəyyən edilsin ki: 1.1. emal müəssisələrinə satılmış quru tütünün hər 1 (bir) kiloqramına, yaş tütünün isə hər 10 (on) kiloqramına görə tütün istehsalçılarına 0,05 manat məbləğində subsidiya verilir; 1.2. bu sərəncamın 1.1-ci bəndi ilə nəzərdə tutulan subsidiya 2016-cı ildə istehsal olunub emal müəssisələrinə satılmış quru və yaş tütünə də şamil edilir.
2. Azərbaycan Respublikasının Nazirlər Kabineti: 2.1. emal müəssisələrinə satılmış quru və yaş tütünə görə tütün istehsalçılarına subsidiya verilməsi qaydasını Azərbaycan Respublikasının Prezidenti ilə razılaşdırmaqla iki ay müddətində təsdiq etsin; 2.2. bu sərəncamdan irəli gələn digər məsələləri həll etsin.
3. Azərbaycan Respublikasının Maliyyə Nazirliyi bu sərəncamın 1.1-ci və 1.2-ci bəndlərinə uyğun olaraq maliyyələşməni təmin etsin".
Məsələ ilə əlaqədar fikir bildirən aqrar sahə üzrə mütəxəssis Çingiz Fərəcov qəzetimizə açıqlamasında qeyd etdi ki, tütünçülüyə ayrıca subsidiyanın ayrılması bu sahənin inkişafına səbəb olacaq: "1987-ci ilə qədər tütünçülük Azərbaycanda sürətlə inkişaf edib. O dövr tütün istehsalı 60 min tona çatmışdı. Tütün istehsalı ilə daha çox Qax, Balakən, Oğuz, Şəki, Zaqatala, Qəbələ rayonu məşğul olurdu. Lakin sonradan bu sahəyə maraq azaldı. Bu sahənin yenidən inkişafı üçün Prezident tərəfindən sərəncam verildi. Tütünçülüyə subsidiyaların verilməsi bu sahəyə marağı artıracaq. Subsidiyaların verilməsi insanların bu işdə çalışmasına meylini artıracaq. Bu sahənin inkişafı üçün təşkilatçılıq artırılmalıdır. İnsanlar arasında təbliğat işi aparmaq lazımdır ki, dövlətə tütün lazımdır".
Həmsöhbətimiz təklif edir ki, tütünçülüyün inkişafı üçün dünyada məşhur olan tütün sortları Azərbaycan toprağında əkilsin: "Sovet dövründə "Vercina" deyilən tütün sortu əkilirdi. Bu tütünə böyük maraq var. Həmçinin, Türkiyənin "Trabzon" tütünü əkilsə, nəticə müsbət olar. Çünki bu tütünün xoş ətri dünya miqyasında qəbul olunub. Dünyada tanınan və qəbul olunan tütün sortları əkilməlidir. Prezident İlham Əliyevin imzaladığı sərəncam sayəsində bu il də tütünçülük sahəsində müəyyən dərəcədə irəliləyiş əldə olunacaq".
Günel CƏLİLOVA
