Nüsrət İbrahimov: "Hesab edirəm ki, cərimələrin artırılmasının müsbət təsiri olacaq"
Azərbaycanda Tikintilərin Dövlət Reyestrinin aparılması qaydalarını pozan vəzifəli şəxslər cərimələnəcək. Milli Məclisdən verilən məlumata görə, bu, İnzibati Xətalar Məcəlləsinə təklif edilən yeni əlavələrdə öz əksini tapıb.
Yeni layihədə qeyd edilib ki, tikilən, istismar edilən və sökülən tikinti obyektləri, habelə Şəhərsalma və Tikinti Məcəlləsinə əsasən, tikinti obyektlərinə tətbiq edilən qadağalar və məhdudiyyətlər barədə məlumatları Tikintilərin Dövlət Reyestrinə qanunla müəyyən edilmiş müddətdə göndərməyənlər və təqdim etməyən vəzifəli şəxslər cərimələncək. Cərimənin məbləği 500 manatdan 1000 manatadək olacaq. Vəzifəli şəxslər bu xətanı bir il ərzində təkrar törətdikdə onlar 2000 manat məbləğində cərimələnəcək.
Məlumat üçün onu da qeyd edək ki, son dövrlər ölkədə çoxmərtəbəli binaların sayında artım müşahidə olunur. Bəzən sözügedən binalar digər fərdi yaşayış evlərinə, sosial tikililərə təhlükə yaratmaqla inşa edilir. Halbuki, ara məsafənin gözlənilməsi havanın hərəkəti, gün işığının düşməsi, sağlam həyat şəraiti üçün də vacibdir. Bir-birinə çox yaxın tikilmiş çoxmərtəbəli binalarda mənzillərə nəinki günəş işığı düşmür, eyni zamanda, havanın hərəkətinin də qarşısı alınır.
Bütövlükdə Tikintilərin Dövlət Reyestrinin aparılması qaydalarını pozan vəzifəli şəxslərin cərimələnməsi və cərimələrin miqdarının artırılmasını ekspertlər necə dəyərləndirir? Məsələyə münasibət bildirən əmlak məsələləri üzrə ekspert Nüsrət İbrahimov bununla bağlı bir sıra məqamlara toxundu: "Tikintinin reyestrinin aparılması Reyestr Xidmətinə tapşırılıb. Ölkədə kim, harada, nə tikir, tikintinin vəziyyətinin nə yerdə olması barədə ora məlumat verməlidir. Sözügedən məlumatlar əsasında vahid reyestr yaradılır. Reyestrin aparılması üçün bu tələblər qoyulur. Vəzifəli şəxslər tikinti apararkən bu haqda məlumat verməyəcəksə, o zaman cərimələnəcək. Yeri gəlmişkən onu da qeyd edim ki, tikintilərin reyestrinin aparılması deyərkən burada statistik məlumatlar tələb olunur, başqa heç nə. Onu da qeyd edim ki, bizdə statistika sovetdən qalma statistikadır və indi-indi təkmilləşmə işləri aparılır. Burada söhbət həm də sözügedən statistikanın təkmilləşməsindən gedir. Məsələ ondadır ki, bu gün kim, harada, nə tikir onun vahid uçotu heç yerdə aparılmır. Burada söhbət həmin tikintilərin vahid uçotunun aparılmasından gedir. Hesab edirəm ki, cərimələrin artırılmasının müsbət təsiri olacaq".
Vidadi ORDAHALLI
