Zahid Məmmədov: "Hesab edirəm ki, təkcə kənd təsərrüfatı sahəsi yox, yüngül sənaye, neft, nəqliyyat sektorları da brendləşə bilər"
Xəbər verildiyi kimi, Prezident İlham Əliyev "Xarici ölkələrə ixrac missiyalarının təşkilinə, xarici bazarların araşdırılması və marketinq fəaliyyətinə, "Made in Azerbaijan" brendinin xarici bazarlarda təşviqinə, yerli şirkətlərin ixracla bağlı xarici ölkələrdə sertifikat və patentlər almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi Qaydası"nın təsdiq edilməsi haqqında Fərman imzalayıb.
Həmçinin, "Azərbaycan mənşəli qeyri-neft məhsullarının ixracının stimullaşdırılması ilə bağlı görülmüş işlər barədə hesabat"ın forması təsdiq edilib.
Bu fərmanın 1-ci hissəsi ilə təsdiq edilən Qaydada nəzərdə tutulmuş dəstək tədbirlərinin maliyyələşdirilməsi üçün 2016-cı ilin dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan İqtisadiyyat Nazirliyinə 3 milyon manat ayrılıb.
Azərbaycanda dünya bazarına çıxarılacaq xeyli sayda məhsul var və onları brendə çevirmək üçün ölkəyə sadəcə marketoloq sahəsini çox yaxşı bilən şəxslər lazımdır. Bu sahədən xəbərsiz olanlara isə mütəxəssislər təlim keçməlidir. Ona görə də belə bir fərmanın verilməsi müsbət haldır. Bəs ekspertlər bunu necə dəyərləndirir? İqtisadçı-ekspert Zahid Məmmədov buna müsbət yanaşır. Onun fikrincə, Azərbaycanın kənd təsərrüfatı məhsulları olan pomidor, kartof, eləcə də konservləşdirilmiş Azərbaycan məhsulları dünya bazarında kifayət qədər alıcı tutumuna malik ola bilər: "Eləcə də Azərbaycan balı, mürəbbəsi, meyvə və tərəvəzi dünya bazarına brend məhsul kimi çıxarıla bilər. Hələ SSRİ dövründə evdə hazırlanan Azərbaycan mürəbbəsi, hazırlanan şərab, konserva məhsulları Rusiyada alternativsiz məhsullar sayılırdı. Vaxtilə Ordubad, Xaçmaz konserv zavodunda qablaşdırılan məhsullar, demək olar ki, əsl brend idi. Azərbaycan müəllifliyi o an sezilirdi. Mən hesab edirəm ki, təkcə kənd təsərrüfatı sahəsi yox, yüngül sənaye, neft, nəqliyyat sektorları da brendləşə bilər. Məsələn, Azərbaycan Dəmir Yolları, Azərbaycan Hava Yolları - biz bu sektoru da brend edə bilərik. Necə ki, İsveçrə Dəmir Yolları, Türk Hava Yolları dünya səviyyəsində tanınır və sərnişinləri həddən artıq çoxdur. Xarici bazarda təbliğat apararaq insanları Azərbaycanın brend sektorlarına cəlb edə bilərik".
Vidadi ORDAHALLI
