Rüfət Quliyev: "Malın maya dəyəri, satış strategiyası, onun tərkibi kommersiya sirri sayılır"
Xəbər verildiyi kimi, Prezident İlham Əliyev "Kommersiya (vergi) sirri hesab olunan məlumatları əldə edə bilən vəzifəli şəxslərin siyahısı"nın təsdiq edilməsi haqqında Fərman imzalayıb.
Bu fərmanda "Kommersiya (vergi) sirri hesab olunan məlumatları əldə edə bilən vəzifəli şəxslərin siyahısının təsdiq edilməsi barədə" Azərbaycan Respublikası Prezidentinin 2003-cü il 23 oktyabr tarixli, 954 nömrəli Fərmanı, "Kommersiya (vergi) sirri hesab olunan məlumatları əldə edə bilən vəzifəli şəxslərin siyahısının təsdiq edilməsi barədə" Azərbaycan Respublikası Prezidentinin 2003-cü il 23 oktyabr tarixli, 954 nömrəli Fərmanında dəyişiklik edilməsi haqqında" Azərbaycan Respublikası Prezidentinin 2010-cu il 24 noyabr tarixli, 357 nömrəli Fərmanı və "Azərbaycan Respublikası Prezidentinin 2003-cü il 23 oktyabr tarixli, 954 nömrəli Fərmanı ilə təsdiq edilmiş "Kommersiya (vergi) sirri hesab olunan məlumatları əldə edə bilən vəzifəli şəxslərin siyahısı"nda dəyişikliklər edilməsi haqqında" Azərbaycan Respublikası Prezidentinin 2016-cı il 18 aprel tarixli, 863 nömrəli Fərmanı ləğv edilir.
Belə bir fərman biznes sirlərinin daha etibarlı mühafizə olunmasında necə rol oynayacaq?
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, bütün kommersiya sirləri dövlət tərəfindən mühafizə olunmalıdır: "Hətta Avropa və Amerikanın özündə xüsusi şirkətlər var ki, onlar kommersiya şpionajı ilə məşğuldur. Mən sizə deyim ki, malın maya dəyəri, satış strategiyası, onun tərkibi kommersiya sirri sayılır. Məsələn, bu günə qədər heç kim "Pepsi-cola" və "Coca-Cola"-nın tərkibini deyə bilməz. Hətta şəkərin hansı formada istehsal olunması da kommersiya sirri sayılır. Həmçinin tütünün tərkibində olan qatmalar kommersiya sirridir".
Millət vəkilinin fikrincə, belə bir fərmanın imzalanması məqsədəuyğundur: "Bu fərman Avropaya inteqrasiya üçün çox vacibdir və bunu dəstəkləyirəm".
Günel CƏLİLOVA
