Natiq Cəfərli: "Müxtəlif istiqamətlərdə müsbət təsiri ola biləcək"
Azərbaycan və Birləşmiş Ərəb Əmirlikləri (BƏƏ) birgə investisiya fondu yaradacaq. Bu barədə Azərbaycanın BƏƏ-dəki səfiri Daşqın Şikarov media nümayəndələrinə açıqlamasında deyib. Səfirin sözlərinə görə, artıq iki ölkənin rəhbərliyi səviyyəsində ilkin razılaşma əldə olunub.
D.Şikarov qeyd edib: "Belə bir fondun yaradılması qarşılıqlı faydalı layihələrə sərmayə qoymağa imkan verəcək. Xüsusən aqrosənaye, qida sənayesi, logistika və nəqliyyat sistemi üzrə investisiya yatırımlarında artım etmək mümkündür".
Qeyd edək ki, Dövlət Gömrük Komitəsinin hesabatına əsasən, Azərbaycanla BƏƏ arasında 2016-cı ilin yanvar-iyul ayları ərzində mal dövriyyəsi 50,6 milyon dollar həcmində olub.
İqtisadçı-ekspert Fikrət Yusifov qəzetimizə açıqlamasında qeyd etdi ki, Birləşmiş Ərəb Əmirlikləri ilə birgə investisiya fondunun yaradılması barədə yüksək səviyyədə razılığın əldə olunması hər iki ölkənin rəhbərliyinin böyük layihələrin icrası sahəsində birgə fəaliyyət göstərmək marağından irəli gəlir: "Bəlli məsələdir ki, hər iki ölkənin iqtisadiyyatı neftlə bağlıdır və neft pullarının bir hissəsinin bu qaydada birgə layihələr üçün istifadə edilməsi hər iki tərəf üçün maraqlıdır. Son zamanlar Azərbaycanla BƏƏ arasında iqtisadi əlaqələr daha da genişlənir. Belə olan halda, birgə fondun yaradılması təqdirəlayiq bir addım olar və hər iki ölkənin iqtisadiyyatına fayda gətirərdi".
İqtisadçı-ekspert Natiq Cəfərli isə bildirdi ki, yaradılması nəzərdə tutulan fondun həcmi və hansı sahələrə üstünlük verəcəyi hələ açıqlanmayıb: "Belə bir fondun yaradılması pozitiv xəbərdir. BƏƏ Azərbaycan ərazisində investsiya layihələri həyata keçirəcəksə, bu əlavə iş yerləri və əhalinin maaşla təmin olunması deməkdir. Fonddan gələn gəlir vasitəsilə gələcəkdə xarici ixracatla məşğul olunacaq və bu, ölkənin imtiyazlarını ödəmək üçün çox pozitiv rol oynaya bilər. Müxtəlif istiqamətlərdə müsbət təsiri ola biləcək. Amma fondun necə idarə olunmasından da çox şey asılı olacaq. Görüntü üçün nəzərdə tutulan layihələr olacaqsa, nəticəni görməyəcəyik. Real sektorda iş yerləri yaradılacaqsa, ixracatda önəmli rol oynayan sahələrə, müəssisələrə investisiya yatırılacaqsa, gələcəkdə müsbət təsirlərini görmək olar".
Həmsöhbətimiz onu da əlavə etdi ki, adıçəkilən fondun tamamilə formalaşması, fəaliyyətə başlaması və investisiyalar yatırması üçün ən azı bir neçə il vaxt lazımdır.
Günel CƏLİLOVA
