Zakir Əhmədov: "Burada hansısa risqdən söhbət gedə bilməz"
Məlum olduğu kimi, SOCAR artıq bir aya yaxındır istiqrazlarını satışa buraxıb. Yüz milyon dollarlıq istiqraz buraxılıb. Bir istiqrazın nominal dəyəri 1 000 ABŞ dollarıdır. İstiqrazların müddəti 5 il, illik faizi isə 5 faizdir. Faiz ödənməsi periodu hər 3 aydan bir, 3 aylıq müddətdən sonrakı ilk iş günüdür.
Azərbaycandakı bütün fiziki və hüquqi şəxslər SOCAR istiqrazlarını ilkin bazardan əldə edə bilər. Bu, yerli investorlar üçün bir imtiyazdır. Xarici investorlar isə bu istiqrazları ilkin bazardan deyil, təkrar bazardan ala biləcək.
SOCAR prezidenti mətbuata müsahibəsində bildirib ki, qurum istiqrazlara zəmanət verir: "Bu barədə zərrə qədər narahatlığa ehtiyac yoxdur. Biz lazım olan bütün mexanizmləri qurmuşuq və verdiyimiz sözün arxasındayıq. Mən xaricilərə vermədiyim bu zəmanəti öz vətəndaşlarımıza vermişəm. SOCAR 40 milyard manatlıq aktivləri ilə Azərbaycanın ən böyük şirkəti, təqribən 1,5 milyard manatlıq vergi ödənişi ilə ən böyük vergi ödəyicisi, 52 000-dən çox işçisi ilə ən böyük işəgötürəni və ölkənin ən böyük ixracatçısı olaraq, 100 % dövlətə məxsus bir şirkətdir. Eyni zamanda, 13,5 milyard manatlıq səhm kapitalı, 1,6 milyard manatlıq nizamnamə kapitalı, 18 əməliyyat şirkəti və 36 birgə müəssisəsi ilə Azərbaycanda öz borc öhdəliklərinin ən etibarlı icraçısı mövqeyindədir. Cəmi 100 milyon ABŞ dolları dəyərində olan SOCAR istiqrazları üzrə öz ödəniş öhdəliklərini yerinə yetirmək SOCAR üçün hansısa maliyyə çətinliyi yarada bilməz".
Bütün bunlar o qənaətə gəlməyə əsas verir ki, sözügedən istiqrazlar, demək olar, risqsizdir. Məsələyə münasibət bildirən ekspert Zakir Əhmədovun fikrincə, burada hansısa risqdən söhbət gedə bilməz: "Çünki SOCAR-ın 40 milyard manatlıq aktivləri fonunda 100 milyon dollarlıq istiqraz elə də böyük məbləğ deyil. O baxımdan hərracda iştirak edənlərə tam zəmanət vermək olar. Bu gün ölkədə fəaliyyət göstərən bankların imici göz qabağındadır. Hazırkı şəraitdə əhalinin banklara etibarından danışmaq çətindir. Banklarla bağlı məlum proseslərlə əlaqədar insanların banklara inamı xeyli sarsılıb. O üzdən, vəsaiti olanların çoxu pulu yastıq altında saxlayır. Bu da ölkə iqtisadiyyatına ziyandır. Ancaq həmin vəsait istiqrazlara yönəlsə, bu zaman həm dövlət qazanacaq, həm də istiqrazı alanlar. Hesab edirəm ki, istiqrazlarla bağlı səslənən bəzi pessemist fikirlərin heç bir əsası yoxdur".
Vidadi ORDAHALLI
