Əkrəm Həsənov: "Bank müştərilərə öz etibarlılığını sübut etmək üçün hesabatlarını mütəmadi açıqlamalıdır"
Milli Məclisin son keçirilən plenar iclasında "Kredit büroları haqqında" qanun layihəsi müzakirə olunub. Sözügedən qanun layihəsi haqqında Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə məlumat verib.
Qanun layihəsi ilə bağlı çıxış edən millət vəkili Qüdrət Həsənquliyev isə deyib ki, banklar maliyyə hesabatlarını vaxtında açıqlamalıdır: "Vətəndaş da bu məlumatlarla tanış olmalıdır. Çünki vətəndaşlar pullarını banklara qoyur, sonradan banklar bağlananda vətəndaşlar əziyyət çəkir. Bankların məlumatları açıqlaması təmin olunmalıdır ki, vətəndaş bankın vəziyyətini qiymətləndirə bilsin".
Məsələ ilə bağlı fikir bildirən bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, banklar internet saytlarında rüblük və illik hesabatlarını açıqlamalıdır. Bu, Mərkəzi Bank tərəfindən qəbul olunan "Korporativ idarəetmə" haqqında sənəddə qeyd olunur: "Banklar maliyyə hesabatlarından əlavə, risqlər, idarə olunma və daxili nəzarət sistemləri haqqında məlumat verməlidir. Bütün bu məlumatları banklar öz saytlarında yerləşdirməlidir.
Kredit sözünün mənası etibar deməkdir. Əmanət isə banka kredit vermək mənasını daşıyır. Yəni hər ikisi etibar deməkdir. Bank müştərilərə öz etibarlılığını sübut etməlidir ki, ora əmanət qoyulsun. Biz banka əmanət yerləşdirərkən bank bizdən nə girov tələb edir, nə də zamin. Beynəlxalq təcrübəyə əsasən, banklar mütəmadi maliyyə hesabatı verməlidir ki, əmanətçilər ona etibar etsin. Xarici ölkələrdə fəaliyyət göstərən banklar daha çox inam qazanmaq üçün qanunun tələb etdiyi məlumatlardan da əlavə informasiyalar açıqlayır. Amma bizim bankların əksəriyyəti vaxtaşırı öz hesabatlarını açıqlamır. Həmin bankların vəziyyəti yaxşı olmadığı üçün öz durumunu gizlədir. Bankın maliyyə vəziyyəti yaxşı olarsa, məmnuniyyətlə öz hesabatını açıqlayar. Avropa ölkələrində fəaliyyət göstərən hər hansı bir bank öz hesabatını təqdim etməsə, heç kim ora bir qəpik belə qoymaz. Təəssüf ki, bizdə əhalinin maliyyə biliyi zəifdir. Bank nümayəndələri media vasitəsilə özlərini reklam edərkən əhali fikirləşir ki, onların vəziyyəti yaxşıdır. Əksinə, maliyyə durumu zəif olan, hesabatını açıqlamayan banklar özlərini reklam edir. Onu da deyim ki, bankların maliyyə hesabatını açıqlamaması qanun pozuntusudur. Bununla bağlı dövlət tərəfindən müəyyən işlər görülməlidir".
Həmsöhbətimiz onu da əlavə etdi ki, iyulun 21-də Maliyyə Bazarlarına Nəzarət Palatası tərəfindən 4 bankın fəaliyyətinə xitam verildi: "Həmin bankların bağlanmasına səbəb kimi göstərildi ki, Palataya təhrif edilmiş hesabatlar təqdim ediblər. Mən sizə deyim ki, bağlanan 4 bankdan biri mütəmadi hesabatını dərc edirdi. Hesabatların açıqlanması da o demək deyil ki, məlumatlar həqiqətə uyğundur. Açıqlanan hesabatların düzgün olması Palata tərəfindən dəqiqliklə yoxlanmalıdır".
Günel CƏLİLOVA
