Rəşad Həsənli: "Bankın fəaliyyəti dayandırılan zaman vətəndaşa dəymiş ziyanın ödənilməsində problem yaranır"
Aparılan yoxlamalar göstərir ki, bəzi banklar əhalidən qəbul etdiyi əmanətləri rəsmi şəkildə qeydiyyata salmayıb.
Bunu hüquqşünas Ərşad Hüseynov media nümayəndələrinə açıqlamasında bildirib. O qeyd edib ki, bankların əmanətləri qaytarmaması halı ilə çox rastlaşıb: "Hüquqlarını təmsil etdiyim şəxslə banka gedib onlar ilə söhbətlər aparmışıq. Bankdan bildiriblər ki, "narahat olmayın, pulunuz ödəniləcək". Biz isə rəsmi sənəd istəmişik. Deyirik ki, "pulun filan tarixdə ödəniləcəyinin göstərildiyi bir rəsmi sənəd verin". Amma banklar rəsmi sənəd verməkdən yayınır. Bankların belə yayınmaları bizdə şübhə doğurur. Bəzi banklarda aparılmış yoxlamalar zamanı bir çox vətəndaşın əmanətinin reyestrdən keçirilmədiyi üzə çıxıb. Əmanət müqaviləsi bağlanıb, sadəcə reyestrdən keçirməyiblər. Düzdür, banklar "biz ödəməyəcəyik" demirlər, amma rəsmi sənəd də vermirlər. Bank rəsmi sənəd versə, vətəndaş gedib evində gözləyər. Biz də baxarıq, bank rəsmi sənəddəki vaxtda əmanəti qaytarmasa, məhkəməyə müraciət edərik. Bu sahədə böyük problemlər var. Vətəndaşlar incidildiyindən, onların banklara etibarı azalıb. İndi heç kəs banka pul qoymaq istəmir. Çünki əvvəllər bəzi banklara pul qoymuş müştərilər pullarını ala bilmir".
İqtisadçı-ekspert Rəşad Həsənli qəzetimizə açıqlamasında qeyd etdi ki, bank sektorunda qeyri-leqal fəaliyyətlərə mütəmadi rast gəlinir. Qeydiyyata düşməyən vəsaitlərin dövr olunması kimi hallar müşahidə olunur: "Bəzi banklarda əmanətin qəbul olunması sənədləri saxta da ola bilər. Təcrübələrə əsaslansaq, deyə bilərik ki, əksər hallarda vətəndaşlar öz hüquqlarını bilmədiyi üçün bu cür mənfi nəticələr ortaya çıxır. Vətəndaş deyir ki, o, manatla kredit götürüb, ancaq rəsmiləşdirmədə isə xarici valyuta qeyd olunur. Bu kimi hallar banklara yatırılan əmanətlərdə də qeydə alınır. Banklar əmanətlərin hansı şərtlərlə sığortalanması haqqında vətəndaşlara düzgün məlumat vermir. Banklar vətəndaşlara bildirmir ki, Əmanətlərin Sığortalanması Fondu hansı şərtlərlə yatırılan depoziti sığortalayır. Bankın fəaliyyəti dayandırılan zaman vətəndaşa dəymiş ziyanın ödənilməsində problem yaranır. Vətəndaşa dəymiş ziyan Əmanətlərin Sığortalanması Fondu tərəfindən kompensasiya olunmur. Belə olan halda, vətəndaşlarda belə təəssürat yaranır ki, onun əmanəti qeyri-rəsmi formada qəbul olunub və ya dövriyyədən kənar saxlanır. Amma bir çox hallarda, bu, vətəndaşların mövcud qaydaları bilməməsi və müqavilə şərtlərinə fikir verməməsi ilə bağlıdır".
Günel CƏLİLOVA
