Sığorta bazarında fırıldaqlara son qoyulur

Tarix: 28.07.2016 / 03:05
Bölmə: İqtisadiyyat

Qeyri-neft sektorunun inkişaf etdirilməsi fonunda son dövrlərdə diqqət yetirilən sahələrdən biri də xidmətlə bağlıdır. Bu sahədə artıq mühüm yeniliklərə strat verilir. Xüsusən də sığorta sektorunda. Qeyd edək ki, bu günlərdə Maliyyə Bazarlarına Nəzarət Palatası (MBNP) Sığorta Bazarına Nəzarət Departamentinin rəhbərliyi ilə sığorta bazarının vasitəçiləri arasında görüş keçirilib.

Məlumata görə, görüşdə sığorta sektorunda risqlərin azaldıması və əhalinin sığorta sisteminə olan etimadının qorunmasına dair inkişaf istiqamətləri müzakirə edilib, yüksək endirimlər nəticəsində sığorta təzminatlarının ödənilməsi zamanı sığortaçılar tərəfindən maneələrin yaradılması və istehlakçıların hüquqlarının pozulması hallarının qarşısının alınmasının vacibliyi vurğulanıb. Sığorta iştirakçılarının məlumatlandırılması və maarifləndirilməsi MBNP-nin prioritet istiqamətlərindən biri olduğunu nəzərə alaraq, görüşdə iştirak edən sığorta vasitəçilərinə icbari sığorta bazarında yüksək komisyon mükafatları və endirimlərə dair mövcud qadağalar barədə məlumat verilib. Həmçinin, sığorta vasitəçilərinin icbari sığorta bazarında bir sıra sığorta şirkətlərinin dempinq siyasəti alətinə çevrilməməsi üçün onlara praktik məsləhətlər və beynəlxalq təcrübəyə əsaslanan tövsiyələr verilib. Bildirilib ki, ölkə iqtisadiyyatının yeni inkişaf strategiyası sığorta sektoru qarşısında yeni çağırışlar yaradır, bazar intizamlılığı və etik davranış qaydalarına riayət olunmasını zəruriləşdirir. Bununla yanaşı, Maliyyə Bazarlarına Nəzarət Palatasının (MBNP) sığorta satışları zamanı endirim və güzəştlərinin ləğvi ilə bağlı qərar çıxarması vəziyyəti əhəmiyyətli dərəcədə dəyişib. Bu addım sığorta satışlarında sağlam rəqabət yaratmaq məsələsində müstəsna rol oynayır. Belə ki, məsələn, əvvəllər avtomobilini icbari qaydada sığortalamaq istəyən müştəri, hansı şirkət və ya agent daha çox endirim edirdisə, avtomobilini orada sığortalamağa üstünlük verirdi. Endirimlərin ləğvi isə sığorta bazarında qiymət fərqini aradan qaldırır. Bu vəziyyətdə avtomobil sahibləri daha yaxşı xidmət göstərən şirkət seçiminə üstünlük verəcək. Bunu yerli sığorta brokerləri də təsdiqləyir.

"Caspian İnternational Broker" şirkətinin fərdi satışlar departamentinin müdiri Elgin Yəhyayev bildirib ki, sürücülər avtomobil sığortasını, xüsusilə də icbari sığortanı sığorta brokerlərindən almağa üstünlük verəcək. Belə ki, şirkətdən birbaşa və ya agent vasitəsilə sığorta almaqdansa, broker vasitəsilə sığorta almaq daha sərfəlidir. Çünki broker müştərinin marağından çıxış edir, ona hansı məhsulun lazım olduğunu və ya hansı şirkətin keyfiyyətli xidmət göstərdiyini deyir. Amma sığorta məhsulunu şirkətlər və agentlər vasitəsilə əldə edərkən seçim imkanları məhdud olur. Sığorta ilə bağlı bəzi detallar var ki, müştərinin ziyanına olsa da, agentlər ya bilərəkdən, ya da əhəmiyyət vermədən bu məlumatları müştəriyə açıqlamır. Qəza baş verən zaman ödənişlə bağlı hər hansı bir mübahisə yarananda isə müştəri ödəniş ala bilmədiyi ilə bağlı narazılığını bildirir. Sığorta şirkəti isə onu məlumatsızlıqda günahlandırır.

Sığorta brokerinə müraciət etməyin digər üstünlüyü ondan ibarətdir ki, sığorta məhsulu ilə bağlı hər bir nüans müştəriyə izah edilir. Məsələn, azadolma məbləği, avtomobil tamamilə yararsız hala düşdüyü zaman sığorta ödənişinin məbləği, bəzi hallarda sığorta şirkətlərinin ödəniş verərkən çıxdığı, amma əvvəlcə müştəriyə izah etmədiyi aşınma əmsalı haqqında müştərilər məlumatlandırılır. Bundan əlavə, avtomobilin zəmanəti varsa, seçilən sığorta şirkətinin rəsmi servisdə təmir edilib-edilmədiyi bildirilir ki, qəza baş verəndə müştəri servis seçimi ilə bağlı etiraz etməsin. Hətta müştəri rəsmi servisdə təmir xidmətini istəmirsə belə, bunu əvvəlcədən yazılı şəkildə imzalayır.

E.Yəhyayev isə bildirib ki, hətta təmir zamanı adi servisin təqdim etdiyi qiymətlə rəsmi servis arasında az fərq varsa, broker avtomobilin rəsmi servisdə təmir edilməsinə çalışır. Məsələn, bir maşının adi servisdə təmiri 500 manatdır. Eyni maşının rəsmi servisdə təmiri 550 manata başa gəlir. Bu zaman, müqavilədə nəzərə alınmasa belə, avtomobil rəsmi servisdə təmir edilir. Departament müdirinin sözlərinə görə, sığorta brokeri satış zamanı yalnız məsləhətlərlə kifayətlənmir. Qəza zamanı da müştərini lazımı istiqamətə yönəldir və məsləhətlər verir: "Qısaca onu demək olar ki, sığorta agenti və ya şirkət sadəcə sığortanı satır, sığorta brokeri isə müştəriyə xidmət göstərir".

O da vurğulanır ki, qiymət fərqinin aradan qalxması ilə xidmət və seçim imkanının genişliyinə görə icbari sığortaları da sığorta brokeri vasitəsilə alanlar artacaq. İndiyə kimi brokerlər vasitəsilə icbari sığortaları əsasən korporativ müştərilər alırdı. Belə ki, avtomobillərini kasko sığortalayan şirkətləra icbari sığortanı da brokerdən sifariş edirdilər. İndi isə adi avtomobil sahibləri bu sığorta üçün brokerə müraciət edəcək. Bütün bunlar sığorta bazarında narazılıqların və çatışmazlıqların aradan qalxmasında mühüm rol oynayacaq.