Neft və qaz şirkəti SOCAR Avropa Çempionatında reklam yerləşdirməklə böhrana qarşı mübarizə aparır. Trend-in məlumatına görə, bu barədə Almaniyanın "Der Tagesspiegel" qəzetində dərc edilən "Futbol və qara qızıl" məqaləsində deyilir.
Məqalədə deyilir ki, top hərəkət etdiyi yerdə tamaşaçı da olacaq. Avropa titulu uğrunda mübarizə gedəndə milyonlarla insan onu stadionlarda, açıq məkanlarda, mobil telefonlarında və ya evlərdə olan monitorlarda izləyir – reklam üçün bu ideal bir imkandır.
Məqalə müəllifləri yazırlar ki, Bakı, Azərbaycandan olan neft və qaz şirkəti SOCAR bu imkandan istifadə edərək, özünü Avropada tanıdır: "Çünki, onun yeni müştəriləri məhz oradadır. Şirkət onlara qaz nəql edəcək. 2020-ci ildən etibarən Avropa şəbəkəsinə qazın ilk kubometrləri daxil olacaq. Bu gün artıq Socar Türkiyə və Gürcüstana qaz nəql edir. Avropaya yönələn qaz boru kəmərləri hələ ki, Türkiyədə sona çatır. 2020-ci ildən etibarən Tanap (Trans-Anadolu Boru Kəməri) və onunla birləşən Tap (Trans Adriatik Boru Kəməri) vasitəsilə Avropaya qazın nəqli gerçəkləşəcək. On iki şirkət bu meqalayihədə iştirak edir. Toplam sərmayə 45 milyard dollara çatır".
