"Standard&Poors" beynəlxalq reytinq agentliyi Azərbaycanın bank sektorunda risqləri qiymətləndirib. Agentlik bank sektorunda iqtisadi və sənaye risq trendlərini stabil olaraq müəyyən edib. Qurum bank sektorunda risqlərin artım səviyyəsinə görə Azərbaycanı 10 ballıq şkala üzrə 9 balla qiymətləndirib.
Qeyd edək ki, 1 bal ən az, 10 bal isə ən yüksək risq olaraq müəyyən edilib.
Maraqlıdır, Azərbaycanın bank sektorunda risqlər niyə yüksəkdir və bu sahədə hansı addımlar atılmalıdır? Bu risqlərin vətəndaşların götürdükləri kredit faizlərinə və banklara qoyduğu depozitlərə təsiri varmı?
“Standard&Poors" beynəlxalq reytinq agentliyi Azərbaycanın bank sektorunda risqlərin artım səviyyəsinə görə Azərbaycanı 10 ballıq şkala üzrə 9 balla qiymətləndirib, bu isə o deməkdir ki..”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, beynəlxalq agentlikləri bu cür risqləri kreditor, investorlar üçün müəyyən edir. Agentliklər bu məlumatlar sayəsində hansısa ölkənin bank sektorunun ümumi vəziyyətini ictimaiyyətə təqdim edirlər. Beləliklə, səhmdar və ya investorlar hansısa ölkədə sərmayə yatırmaq istəyirsə ilk növbədə o ölkənin bank sektorunu araşdırır: “Risqlərin yüksək olması o deməkdir ki, banka əmanət edilən pulun batma ehtimalı da o qədər yüksəkdir. “Standard&Poors" beynəlxalq reytinq agentliyi Azərbaycanın bank sektorunda risqlərin artım səviyyəsinə görə Azərbaycanı 10 ballıq şkala üzrə 9 balla qiymətləndirib. Bu isə o deməkdir ki, Azərbaycanın bank sektoruna etibar etmək olmaz”.
Bank sektorunda risq səviyyəsinin artmasının səbəblərinə gəlincə, ekspert bildirdi ki, buna səbəb problemli kreditlərin həcminin artmasıdır: “Bundan əlavə, bank sahibi bankı iflasa sürükləyə bilər. Bir sözlə, bank sektorunda risqin artması üçün müxtəlif səbəblər var. Onu da deyim ki, bu gün ölkəmizdə ləğv prosesində olan 21 bank var. Bu banklarda vətəndaşlardan savayı sahibkarların, şirkətlərin pulu qalıb, geri ala bilmirlər. Həmin pulun məbləği isə təxminən 2 milyarddır. Ləğv prosesində olan banklarda pulu batan sahibkarlar arasında xaricilər də var. Xarici hüquqi şəxslərin Azərbaycan banklarında pulu qalıb. O pullar nəinki geri qayıtmır, proseslə bağlı informasiya belə verilmir. Sahibkar pulunu nə vaxt geri ala biləcəyi haqda məlumatsızdır. “Nə vaxt veriləcək”, “niyə verilmir” kimi suallara cavab verilmir. Təbii ki, bu kimi faktlar Azərbaycanın bank sektorunun reytinqinə təsir edir”.
Günel CƏLİLOVA
