Dünyada yaranan iqtisadi böhran təbii olaraq Azərbaycana təsirsiz ötüşməyib. Son bir il ərzində xidmət və ərzaq qiymətlərinin bahalaşması, bu prosesin hələ də davam etməsi xüsusən də əhalinin aztəminatlı hissəsinin gündəlik həyat şəraitində hiss olunur. Hələ sentyabr ayında ərzaq bahalaşmasının 22 faizi keçdiyi bildirilmişdi. Bahalaşmanın 2023-cu ildə də davam edəcəyi proqnoz edilir. Buna səbəb kimi isə idxal ərzaq məhsullarının həcminin artmasıdır.
Açıqlanan statistik məlumatlara əsasən, cari ilin 11 ayının yekunlarına görə, Azərbaycan 2 milyard 88 milyon 142 min dollar dəyərində yeyinti məhsulları idxal edib. Bu isə 2021-ci ilin eyni dövrü ilə müqayisədə 386,5 milyon dollar və ya 22,7 faiz çoxdur. Qeyd edək ki, Azərbaycana bütün idxalın 16,21%-i ərzaq məhsullarının payına düşüb.
“Ölkənin ərzaq məhsulları ilə təmin olunması üçün büdcədən keçən il cəmi 997 milyon manat vəsait ayrılsa da, idxal məhsullarının həcmi artır”
Idxal olunan ərzaq məhsullarının həcminin artması barədə fikir bildirən Liberal İqtisadçılar” Mərkəzinin rəhbəri Akif Nəsirli qeyd etdi ki, ölkənin ərzaq məhsulları ilə təmin olunması üçün büdcədən keçən il cəmi 997 milyon manat vəsait ayrılıb: "Azərbaycan potensialına görə aqrar ölkədir. Ölkəmizdə kənd təsərrüfatına yararlı kifayət qədər geniş torpaq sahələri var. Əhalinin 65 faizi aqrar vərdişlərə malikdir. Buna baxmayaraq, hazırkı iqtisadi siyasət ölkədə ərzaq məhsullarının istehsalının azalması ilə nəticələnir. Məhsuldarlıq aşağı düşür. Eyni zamanda, əhali üçün kənd təsərrüfatı ilə məşğul olmaq maraqsız görünür. Onlar istehsal etdiyi məhsul üçün bazar tapa bilmirlər”.
Ekspert bildirdi ki, 10 milyon əhalisi olan ölkənin ərzaq məhsulları ilə təmin olunması üçün büdcədən keçən il cəmi 997 milyon manat vəsait ayrılıb. Gələn il bu rəqəm 1,2 milyard manat olacaq. Bu isə ərzaq məhsullarının ölkə daxilində geniş istehsalına şərait yaradılması baxımından çox aşağı göstəricidir: “Azərbaycanda kənd təsərrüfatına qoyulan investisiyanın həcmi indikindən 5-6 dəfə çox olmalıdır. Yalnız bu yolla ərzaq idxalından asılılıq aradan qalxa bilər”.
Günel CƏLİLOVA
