Azərbaycanda hər sahədə olduğu kimi, tikinti materialları bazarında da sürətli qiymət bahalaşması gedir. Ötən ilin payızından başlanan bahalaşma son aylar daha da kəskinləşib. Bahalaşma tikinti işlərinin xərcinə də təsir göstərməkdə davam edir.
Ekspertlər hesab edir ki, tikinti materiallarına olan tələbin daha çox yerli istehsal hesabına ödənilməsinə nail olunmalıdır. Belə olarsa dünya bazarında qiymət artımları baş verən zaman Azərbaycanın istehlak bazarına ciddi təsir göstərməz.
Mütəxəssislər onu da bildirir ki, Qarabağda yenidənqurma işləri aparıldığı üçün Azərbaycanın daha çox tikinti materiallarına ehtiyacı var. Bu səbəbdən həm də Qarabağda lazım olan ehtiyacı ödəmək və digər sahələrdə tikinti işlərinin aparıldığını nəzərə alıb bu sektorda yerli istehsalın daha da inkişaf etdirilməsi vacibdir.
Maraqlıdır, yerli tikinti sənayesini necə inkişaf etdirmək lazımdır?
“Tikinti materiallarının qiymətinin bahalaşması digər sahələrdəki bahalaşma ilə birbaşa əlaqəlidir”
Əmlak məsələləri üzrə ekspert Elnur Fərzəliyev bildirdi ki, Rusiya-Ukrayna müharibəsi Azərbaycanda daşınmaz əmlak bazarına mənfi təsir edib: “Müharibənin Azərbaycanın daşınmaz əmlak bazarına hər tərəfdən mənfi təsiri var”.
Ekspertin sözlərinə görə, tikinti materiallarının qiymətinin bahalaşması digər sahələrdəki bahalaşma ilə birbaşa əlaqəlidir: “Yanacağın qiyməti qalxanda yük maşınlarının xərci də artır və qiymətə təsir edir. Bununla yanaşı, tikinti materialı istehsal edən zavodlar var. Bu zavodlar qaz və ya işıqla işləyir. Bahalaşma olanda zavodun satdığı məhsulların qiymətində də artımın olması qaçılmazdır. Çünki ortada qoyulan xərc və götürülən məbləğ var. Digər xərclərin qarşılanması üçün balans qorunmalıdır. Ümumilikdə, son bir il ərzində tikinti materiallarının qiyməti getdikcə artıb və bu tendensiya davam etməkdədir. Elə məhsullar var ki, qiyməti iki dəfədən çox artıb”.
Yerli istehsala gəlincə, mütəxəssis hesab edir ki, yaxın gələcəkdə artıq Azərbaycan özünün tikinti materiallarının istehsalına başlaya biləcək: “Təkcə istehsal etməyəcək, həmçinin digər ölkələrə də ixrac edə biləcək. Biz azad olunmuş ərazilərimizə baxsaq görərik ki, orada 140-a qədər təbii sərvət mövcuddur - qızıl, gümüş, filiz və s. Həmin sərvətlərin mövcud olduğu mədənlərin istifadəsinə başlanılsa, artıq gələcəkdə ölkəmiz bu sahədə digər ölkələrdən asılılığın bir çoxundan qurtula biləcək”.
Günel CƏLİLOVA
