Prezident İlham Əliyev Azərbaycan və Avropa İttifaqı (Aİ) arasında enerji sahəsində strateji əməkdaşlıq haqqında qarşılıqlı anlaşma memorandumunun imzalanmasının yekunlarına əsasən bildirib ki, Azərbaycan artıq bərpa olunan enerji mənbələrinə - külək və Günəş enerjisinə investisiya yatırmağa başlayıb: “Aİ də Azərbaycanın bərpa olunan enerji mənbələri sahəsində malik olduğu böyük potensialı qiymətləndirib. Biz artıq külək və Günəş enerjisinə investisiya yatırmağa başlamışıq. İmkanlarımızın ilkin qiymətləndirməsini həyata keçirmişik”.
Öz növbəsində, Avropa Komissiyasının Prezidenti xanım Ursula Fon der Lyayen bəyan edib ki, Azərbaycanın bərpa olunan enerji mənbələri sahəsində böyük potensialı var: “Xüsusilə də dənizin külək enerjisini və “yaşıl” hidrogeni qeyd etmək istəyirəm. Biz ikitərəfli görüşümüzdə bu mövzunu geniş müzakirə etdik. Bu gün imzalanan Anlaşma Memorandumu vasitəsilə biz həmin sahədə əməkdaşlığımızın möhkəm təməlini qoyuruq. Azərbaycan yanacaq növlərinin təchizatçısı olmaqla yanaşı, tədricən Avropa İttifaqı üçün bərpaolunan enerji növlərini təchiz edən mühüm və etibarlı tərəfdaşa çevriləcək”.
Hiss olunur ki, bərpa olunan enerji sahəsinə xüsusi diqqət var. Görünən odur ki, Avropa İttifaqı da buna xüsusi maraq göstərir. Avropanın Azərbaycanda bərpa olunan enerji sahəsinin inkişafına bu qədər diqqət və qayğı göstərməsinin səbəbi, mahiyyəti nə ilə izah olunur?
“Bərpa olunan enerji mənbələri ilə bağlı ölkəmizin potensial imkanları daha böyükdür”
Sözügedən məsələyə aydınlıq gətirən iqtisadçı alim, professor Əli Əlirzayev Avroittifaqın Azərbaycanda bərpa olunan enerji sahəsinə xüsusi maraq göstərməsinin səbəbini bir sıra faktorlarla əlaqələndirdi: “Bunun başlıca səbəbi Azərbaycanın etibarlı enerji tərəfdaşı olmasına olan inamdır. İnam olmasaydı, Avropa İttufaqı ölkəmizin bərpa olunan enerji sahəsinin inkişafına belə maraq göstərməzdi. Aİ-nin Azərbaycana olan inamı indiyə qədər həyata keçirilən enerji layihələrində Azərbaycanın sərgilədiyi dürüstlükdür. Məsələ ondadır ki, Azərbaycan 90-cı illərdən Qərblə enerji sahəsində əməkdaşlıq edir. İndiyə qədər Qərbin böyük neft-qaz şirkətləri ilə 30-dan çox müqavilə imzalanıb. Azərbaycan imzalanan müqavilələri təftiş edib işi yarıda saxlamayıb. Halbuki, elə neft ölkələri var ki, bir neçə dəfə imzalanan sazişə müdaxilə edir və bu da tərəflər arasında ciddi problemlərə yol açıb. Azərbaycan davamlı olaraq Avropanın enerji təchizatına töhfə verməyə çalışır. Digər tərəfdən, bərpa olunan enerji mənbələri ilə bağlı Azərbaycanın potensial imkanları daha böyükdür. İşğaldan azad olunan ərazilərdə alternativ və bərpa olunan enerji mənbələrinin, həmçinin Xəzər dənizində külək enerjisinin geniş potensialı nəzərə alınarsa, bu, Azərbaycan üçün bərpa olunan enerjinin də Aİ-yə ixrac olunması imkanları yaradır. Avroittifaq bütün bunların fərqindədir. Ona görə də sözügedən sahəyə xüsusi maraq göstərir”.
Professor onu da qeyd etdi ki, bütün bunlar Azərbaycan üçün önəmli əhəmiyyət kəsb edir.
Vidadi ORDAHALLI
