Mərkəzi Bankda Dövlət Neft Fondunun iştirakı ilə növbəti valyuta hərracı keçirilib. Hərracda tələb 18,2 milyon ABŞ dolları təşkil edib və tam təmin edilib. Qeyd edək ki, hərracda tələb olunan məbləğ 2022-ci ildə keçirilən hərraclarda qeydə alınan ən aşağı məbləğdir.
Məlumat üçün bildirək ki, cari ildə ən aşağı tələb mayın 26-da keçirilən hərracda olub. Həmin hərracda dollar alışının məbləği 24 milyon idi. Hərracların nəticələrinin təhlili göstərir ki, bu il dollara tələb zəifdir və tələbdə azalma may ayından bir qədər də güclənib.
Maraqlıdır, dollara tələb niyə azalıb?
"Dollar almaq üçün gərək milli valyuta da əhalidə çox olsun, ancaq hazırda əhalidə gəlir vəziyyəti ürəkaçan deyil"
Bank sahəsi üzrə ekspert Əkrəm Həsənov bildirdi ki, Azərbaycanda bu hərraclar heç nəyin göstəricisi deyil: "Məlumdur ki, hazırda ölkəmizdə 25 bank var və hamısı da Mərkəzi Bankın nəzarəti altındadır. Elə hərracları da keçirən elə Mərkəzi Bankdır. Qeyd edim ki, Elman Rüstəmovun sədrliyi vaxtında banklara əvvəlcədən deyilirdi ki, bu məbləğdən çox verməyin. Ona görə də, belə hərracların ölkəmizdə keçirilməsinin mənası yoxdur. Bu, sərbəst hərrac deyil. Məlumat üçün deyim ki, hərracda iştirak edənlərə hərracı keçirən nəzarət edir. Təsəvvür edirsiniz də, Mərkəzi Bank bir tərəfdən pul siyasətini həyata keçirir, yəni manatın məzənnəsini, dollar satır. O biri tərəfdən də o banklara nəzarət edir. Yəni banklar hardasa ondan asılı vəziyyətdədir. Məhz bu səbəbə görə bir neçə il bundan əvvəl Maliyyə Bazarlarına Nəzarət Palatası təsis olundu ki, yəni nəzarət səlahiyyəti orada olsun. Banklar asılı olmasın Mərkəzi Bankdan. Amma indi ola bilər ki, müəyyən obyektiv səbəblər də var. Yəni bu dəqiqə dollar almaq üçün gərək milli valyuta da əhalidə çox olsun. Bu dəqiqə əhalidə gəlir vəziyyəti ürəkaçan deyil, qiymət artımı var. Ümumiyyətlə, bu hərraclar heç nəyin göstəricisi deyil”.
Günel CƏLİLOVA
