Son günlər ölkəmizdə 1 dollarlıq əskinasların elan saytlarında və sosial şəbəkələrdə kütləvi satışa çıxarılması il bağlı elanlara rast gəlmək mümkündür. Elanlarda 2013-cü ildə tədavülə buraxılmış bir dolların 100, 1000, 3000 manata satın alınacağı təklif olunur.
Bəzi iddialara görə, həmin əsgkinasların kütləvi satışa çıxarılmasına səbəb məşhur iş adamı İlon Maskın "Twitter"dəki paylaşımı olub. O, 2013-cü ildə tədavülə buraxılmış bir dolları məşhur kriptovalyuta olan bitkoinlə dəyişəcəyini bildirib.
Eldəniz Əmirov: “Bu tendensiyanın heç bir iqtisadi əsası yoxdur”
İqtisadçı-ekspert Eldəniz Əmirov bildirdi ki, bu tendensiyanın heç bir iqtisadi əsası yoxdur: “Bir müddət sonra qiymətlə bağlı göstəricilər kəskin şəkildə dəyişəcək. Sadəcə olaraq, müəyyən insanlar var ki, onların dünyada olan maliyyə sahəsində olan uğurları, şöhrəti sayəsində istənilən açıqlamaları dünya trendinə çevrilir. Bu səbəbdən də İlon Maskın 1 dollarla bağlı fikri bu sahədə canlanmaya səbəb oldu. Bir dollarlıq əskinas az olduğundan bəzi iş adamları buna simvolik dəyər verirlər. Bir müddət sonra bu qiymətlə bağlı göstəricilər kəskin şəkildə dəyişəcək. Heç bir iqtisadi və maliyyə dəyəri olmayan bir prosesdir”.
Elşad Məmmədov: “Bir dollarlıq əskinasla bağlı yayılan elanlara inanmamaq daha məqsədəuyğundur, çünki...”
İqtisad Universitetinin professoru Elşad Məmmədov bildirdi ki, bir dollarlıq əskinasla bağlı yayılan elanlara inanmamaq daha məqsədəuyğundur, çünki bu cür ajiotaj yaradan hallarda investorların aldanması ehtimalı yüksək olur: “Hazırda dollar əskinasları üzərindən yaşanan ajiotaj daha çox spekulyativ amillərlə bağlıdır. Yəni mövcud tələb böyük kapital yığımı həyata keçirmək üçün atılan bir addımdır. Təəssüf ki, bu cür addımlar bir çox hallarda təcrübəli investorları da çaşdırır və onlar da müəyyən yatırımlar qoyurlar. Demək olar ki, bu gün maliyyə və fond bazarları şişmiş vəziyyətdədir. Bəzən bu tip investisiyaların həyata keçirilməsi nəticəsində böyük mənfəətlər əldə etmək mümkün olsa da, risqlər olduqca çoxdur. Çünki hər an real olaraq bir dəyərə malik olmayan investisiya alətlərinin qiymətləri xeyli dərəcədə aşağı düşə bilər və nəticədə böyük məbləğli vəsait itkiləri yaşana bilər. Ona görə də investorlar ehtiyatlı olmalıdır. Aktivlər nöqteyi-nəzərdən 2013-cü ildə tədavülə buraxılmış bir dolların digər bir dollarlıq əskinaslarla müqayisədə heç bir real fərqi yoxdur. Bu baxımdan, məlum ajiotajın məqsədi bazarda tələbin süni şəkildə şişirdilməsi ilə böyük vəsaitlər əldə etməkdir. İnvestorlar bu cür investisiyalara yatırım edərkən çox diqqətli və realist olmalıdırlar”.
Günel CƏLİLOVA
