Bakı Nəqliyyat Agentliyi (BNA) dövlət büdcəsindən ən çox vəsait alan qurumlardan biri olsa da, ziyanla işləyir. Qurumun hesabatında qeyd edilir ki, 2021-ci il yanvarın 1-nə Bakı Şəhər İcra Hakimiyyəti yanında BNA-nın vergi öhdəlikləri 2,008 milyon manat təşkil edib.
Qurum 2018, 2019 və 2020-ci illəri də zərərlə başa vurub. BNA-nın 2019-cu il yanvarın 1-nə aktivləri 139,699 milyon manat olub ki, bu da 1 il əvvələ nisbətən 2,5 dəfə çoxdur. Hesabat dövründə Agentliyin 83 min manatlıq öhdəlikləri formalaşıb, balans kapitalı isə 2,5 dəfə artaraq 139,616 milyon manata çatıb, o cümlədən 49,068 milyon manatlıq nizamnamə kapitalı formalaşıb, ona dövlət xəttilə qoyulmuş investisiyalar isə təxminən 2 dəfə artaraq 134,73 milyon manat olub.
Məlumatlara görə, BNA 2018-ci ili isə 32,156 milyon manat zərərlə başa vurub. Bununla da, Agentliyin yığılmış zərəri 3,7 dəfə artaraq 44,182 milyon manata çatıb.
Sənədə əsasən, həmin il BNA cəmi 68 min manat əməliyyat gəliri əldə edib. Agentliyin xərcləri isə 32,224 milyon manat, o cümlədən əmək haqqı və işçilərlə bağlı digər xərcləri 1,659 milyon manat, amortizasiya xərcləri 8,132 milyon manat, əməliyyat xərcləri 16,416 milyon manat, digər xərcləri isə 6,019 milyon manat təşkil edib.
Maraqlıdır, qeyd olunan qurum dövlət büdcəsindən ən çox vəsait qurumlardan biri olsa da, niyə ziyanla işləyir?
“Çox təəssüf ki, dövlət şirkətləri, o cümlədən Bakı Nəqliyyat Agentliyi xərclərlə bağlı hansısa məlumat vermir, yəni qurumun xərci...”
Iqtisadçı ekspert Natiq Cəfərli qeyd etdi ki, dövlət qurumlarının zərərlə işləməsi bütün dövlət şirkətlərinə xas olan "xəstəlikdir". Unutmaq lazım deyil ki, gəlirlə işləməyin tək yolu qiymət artımı deyil. Ziyanla işləməyin qarşısını almağın yollarından biri xərclərin azaldılmasıdır: “Çox təəssüf ki, dövlət şirkətləri, o cümlədən Bakı Nəqliyyat Agentliyi xərclərlə bağlı hansısa məlumat vermir. Yəni qurumun xərci niyə artıb, hansı səbəbdən ziyana düşüb, vəziyyətdən necə çıxa bilməsi ilə bağlı ictimaiyyətə məlumat verməlidir. Əsas xərclər optimallaşdırılmalıdır. Təəssüf ki, dövlət şirkətlərinin xərcləri şəffaf deyil. Yeyinti hallarının olması maya dəyərinin yüksəlməsinə səbəb olur. Bu səbəbdən də dövlət şirkətlərinin şəffaflığının artırılmasına, bu sahədə nəzarətin gücləndirilməsinə ehtiyac var".
Günel CƏLİLOVA
