Azərbaycanın sosial-iqtisadi müstəvidə uğurlarını şərtləndirən mühüm faktorlardan biri də ölkə regionlarının tarazlı inkişafının təmin edilməsidir. 2003-cü ildən etibarən bu istiqamətdə dövlət tərəfindən atılan addımlar öz məntiqi nəticələrini verməkdə, regionların siması əhəmiyyətli dərəcəsə dəyişməkdədir.
Lakin dövlət əldə edilən nailiyyətlətlərlə fəaliyyətini məhdudlaşdırmır, regionların inkişafı istiqamətində yeni mühüm addımlar atılır. Bunun real nümunəsi prezident İlham Əliyevin Gəncə səfəri fonunda özünü bir daha qabarıq büruzə verdi.
Bölgələrin tarazlı inkişafı qorunub saxlanılır
Xatırlatmaq lazım gəlir ki, Gəncəyə səfəri fonunda Prezident İlham Əliyev bir sıra açılış və təməlqoyma mərasimlərində çıxış etdi. Dövlət başçısı Gəncə Dövlət Dram Teatrının yeni binasının, 2 saylı Gəncə regional “ASAN xidmət” Mərkəzinin açılışında iştirak edib, Gəncə İdman Sarayında tikinti işlərinin gedişi ilə tanış olub, Gəncədə “Azərbaycan Dəmir Yolları” QSC-nin lokomotiv deposunun istismara verilməsi tədbirində iştirak edib, Gəncə Memorial Kompleksinin təməlini qoyub.
Qeyd edilənlər Gəncənin timsalında regionların inkişafının dinamik xarakterə malik olmasını bir daha nümayiş etdirir. Elə Prezident İlham Əliyev özü də məsələyə məhz bu prizmadan yanaşır: “On səkkiz ildir ki, mən ölkə prezidentiyəm və 18 dəfə Gəncədə olmuşam. Son illərdə biz Gəncənin əsas infrastruktur layihələrini icra etməyə çalışdıq və bu layihələrin böyük əksəriyyəti öz həllini tapdı. Elektrik enerjisi ilə təchizat tam öz həllini tapmışdır. Gəncədə 10 yarımstansiya həm yenidən tikilib, həm də əsaslı təmir edilib. Onların enerji istehsalı gücü 220 meqavatdır, şəhərin tələbatını tam ödəyir. Eyni zamanda, şəhərin artan tələbatı, o cümlədən sənaye potensialı da nəzərə alınacaq. Qazlaşdırma layihəsi tam icra edilibdir. İçməli su layihəsi hələ ki, icra edilir. Əfsuslar olsun ki, bu layihə bir qədər uzandı. Düzdür, çox genişmiqyaslı layihədir, həm də maliyyətutumlu layihədir, təqribən 800 milyon manat dəyərində olan bir layihədir. Bu layihənin icrası nəticəsində Gəncə şəhərinin içməli su və kanalizasiya problemləri birdəfəlik həll olunacaq. Mənə verilən son məlumata görə, hazırda bu layihənin icrası 42 faiz səviyyəsindədir…Avtomobil yollarının çəkilişi ilə bağlı deyə bilərəm ki, indi bütün ölkədə olduğu kimi, Gəncəyə gedən yollar tam müasirləşdirilib. Həm Bakı-Gəncə avtomobil yolunun, həm də Gəncə-Qazax-Gürcüstan sərhədi yolunun çəkilişi başa çatıb. İndi biz bu yolu iki zolaqdan dörd zolağa genişləndiririk. Eyni zamanda, Gəncədən digər şəhərlərə - Göygöl, Daşkəsən şəhərlərinə gedən yollarda da əsaslı təmir işləri aparılmışdır. Bildiyiniz kimi, Gəncəyə Bakıdan dəmir yolu xətti də tam modernləşdirilib. Bu, əslində, Şərq-Qərb nəqliyyat dəhlizinin bir parçasıdır. İndi xəttə sürətli qatarlar da buraxılıb… Gəncə Beynəlxalq Hava Limanı uzun illər bundan əvvəl mənim təşəbbüsümlə yenidən qurulmuşdur. Yəni, bunlar əsas infrastruktur layihələridir. Bunlar həll olunmadan şəhərin inkişafından söhbət gedə bilməzdi. Bununla paralel olaraq, əlbəttə ki, həm səhiyyə, həm təhsil sahəsində bütün sosial infrastruktur yenilənib”. Dövlət başçısı onu da diqqətə çatdırıb ki, əsas diqqət mərkəzinin azad edilmiş torpaqlara - Qarabağa və Zəngəzura olmasına baxmayaraq, eyni zamanda, bütün başqa şəhər və rayonlarımız daim diqqətlə əhatə olunur. Bu da regionların tarazlı inkişafının qorunub saxlanılmasında mühüm əhəmiyyət kəsb edir.
Digər tərəfdən Gəncə şəhərinə səfəri və səfər zamanı bir sıra sosial obyektlərin açılışlarında iştirak etməsi dövlət başçısının ölkənin bütün regionlarının inkişafı məsələlərini şəxsi nəzarətində saxlamasını, geniş quruculuq və bərpa işlərinə dair ardıcıl tapşırıqlar verməsini bir daha aydın şəkildə göstərir. Bu mənada hesab edilir ki, Azərbaycan prezidenti tərəfindən Gəncəyə səfərin həm də böyük ictimai-siyasi əhəmiyyəti var. Bu, ilk növbədə, Azərbaycanın ikinci şəhərinin infrastrukturu baxımından Bakıya yaxınlaşması layihəsinin gerçəkləşməsinə xidmət edən bir addımdır. Məsələnin mahiyyəti odur ki, dövlət illərdir bölgələrdə böyük layihələrin həyata keçirilməsinə çalışır ki, təkcə Bakıdan ibarət bir infrastruktur modeli olmasın. Həmçinin Azərbaycanın bütün bölgələrinə yayılan və şəhərlərin rifahına xidmət edən bir sistem qurulsun. Bu proqramda Gəncənin xüsusi yer alması da təsadüf deyil. İlk növbədə o baxımdan ki, Gəncə ölkəmizin ən böyük ikinci şəhəri, həm də Qarabağ bölgəsinə yaxınlığı ilə seçilən yerlərdəndir. Məhz bu mənada Gəncə Qarabağda gedən proseslərin idarə dilməsi proseslərində çevikliyin daha da artırılmasına yeni təkan verə bilər, bunu dövlət də nəzərə alır.
İkinci Qarabağ müharibəsindən sonra azad edilmiş ərazilərlə bağlı Gəncənin əhəmiyyəti daha da artıb
Yeri gəlmişkən qeyd edək ki, müsahibəsində president İlham Əliyev maraqlı bir nüansa da toxundu. Qeyd etdi ki, İkinci Qarabağ müharibəsindən sonra Gəncə, eyni zamanda, Kəlbəcər rayonunun inkişafı ilə bağlı öz sözünü deyir və deməlidir: “Çünki hazırda bizim Kəlbəcərə yeganə, yəni rahat gedə biləcəyimiz yol Gəncədən Göygölə, Göygöldən Kəlbəcərədir. Rahat deyəndə, biz ancaq yaz-yay mövsümlərində o yoldan rahat istifadə edə bilərik. Çünki qış aylarında yol həm bəzi yerlərdə keçilməz, həm də çox təhlükəli olur. Bu yol faktiki olaraq sovet vaxtında olmayıb, bir cığır idi. Biz qısa müddət ərzində o cığırı genişləndirdik və mən özüm də keçən il o yolla Kəlbəcərə getmişdim, Murov aşırımından keçərək. Hazırda Murov dağının altından böyük - uzunluğu təqribən 12 kilometr olan tunel çəkilir. Yəni, Kəlbəcərin gələcək inkişafı, vətəndaşların oraya qayıtmaları və Kəlbəcər rayonunun, eyni zamanda, Laçın rayonunun təchizatı böyük dərəcədə bu bölgədən təşkil ediləcəkdir. Ona görə Gəncə və bu zona azad edilmiş torpaqların bərpası, vətəndaşların rahat yaşaması üçün xüsusi əhəmiyyət daşıyır. Hazırda bizim hərbi postlarımıza, bizim sərhəd boyunca yerləşən postlara da əsas təchizat buradan gedir. Ona görə Gəncə və Gəncənin ətrafında yerləşən ərazilərin bundan sonra da ölkəmizin həyatında, xüsusilə azad edilmiş torpaqların həyatında xüsusi rolu olacaqdır”.
Hesab edilir ki, həqiqətən də Kəlbəcərin, Laçının, Tərtərin, Ağdam zonasının bərpası və inkişafı baxımından Gəncənin logistik məkan olması müstəsna önəmə malikdir. Bundan başqa, Gəncə həm də nəqliyyat dəhlizinin mərkəzində yerləşir. Bu şəhər Gürcüstanla əlaqələr baxımından da vacib əhəmiyyətə malikdir. Burada salınan yolların həm də İpək yolunun bir hissəsi olması Gəncəni önəmli regiona çevirir. Bütün bunlar Gəncənin inkişafına dövlət tərəfindən xüsusi qiqqətin olmasının səbəblərini də izah edir. Amma təbii ki, bu diqqət təkcə Gəncə ilə məhdudlaşmayaraq, Azərbaycanın əslində, bütün regionlarını əhatə edir. Lə bu da regionlarda tərəqqini daha dinamik hala gətirir.
Tahir TAĞIYEV Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
