Rusiya prezidenti Vladimir Putin Stavropol vilayətinin qubernatoru Vladimir Vladimirovu qəbul edib və regionda turizm sahəsinin inkişafı məsələləri barədə məlumat alıb. Qubernator Putinə Qafqaz Mineral Suları kurort bölgəsinin inkişaf planları barədə məruzə edib.
Bildirib ki, Qafqaz Mineral Suları həm sərnişin axınına, həm istirahət edənlərin sayına, həm də mineral sularının özəlliklərinə görə Avropadakı bütün analoqlarını üstələyir: “Üstəlik Sizə demək istəyirəm ki, 2019-cu ildə, çünki ötən ili saymaq istəmirəm, 30 faiz geriləmə olub,-uzaq xarici ölkələrdən 147 min şəxs Qafqaz Mineral Sularında istirahət edib”.
Vladimir Vladimirov onu da deyib ki, bir çox xarici investorlar, o cümlədən azərbaycanlılar Qafqaz Mineral Suları kurort zonasına böyük yatırımlar qoyur : “Olduqca çox xaricilər, azərbaycanlılar çoxlu pullar yatırırlar. Beş il ərzində, 2015-2020-ci illərdə Sizin sayənizdə biz Qafqaz Mineral Sularına 25 milyard yatırmışıq”.
Qeyd edək ki, son illər azərbaycanlı biznesmen-oliqarxlar Rusiyanın Şimali Qafqaz kurort bölgələrinə böyük həcmdə yatırımlar qoyurlar. Onların arasında Milli Məclisin keçmiş üzvü, “Karat Holding”in rəhbəri Əsabil Orucov da var. Əsabil Orucov Yessentukidə, Kislovodskda beşulduzlu otellər və istirahət mərkəzləri tikib. Bugünlərdə onun Moskvanın da otel sektoruna girdiyi və beş il əvvəl aldığı ərazidə otel-apartament inşasına başladığı haqda xəbər verilib. Azərbaycanlıların Rusiyaya geniş investisiya qoyuluşu hətta həmin ölkənin prezidentinə məruz edilir. Bu halın Azərbaycan üçün hansı üstünlükləri var?
Beynəlxalq idarəetmə üzrə ekspert, iqtisadçı Asif İbrahimov “Bakı-Xəbər”ə açıqlamasında bildirdi ki, Azərbaycanın Rusiya şirkətləri ilə sıx əməkdaşlıq əlaqələri var: “Rusiya ölkəmizin əsas ticarət tərəfdaşlarından biridir. Ölkələrimiz arasında qarşılıqlı investisiya qoyuluşları reallaşdırılır və birgə layihələr həyata keçirilir. Azərbaycan və Rusiya arasında iqtisadi və investisiya qoyuluşu sahəsində əlaqələri, iş adamları arasında əməkdaşlığı daha da genişləndirmək hər iki ölkənin maraqlarına cavab verir. Hazırda Azərbaycanda 1000-dən çox Rusiya şirkəti fəaliyyət göstərir. Azərbaycan-Rusiya əlaqələrinin əsas istiqamətlərindən biri qarşılıqlı ticarətdir və bu sahədə əməkdaşlığın genişləndirilməsi üçün kompleks tədbirlər görülür. Rusiya Federasiyasında Azərbaycanın ticarət nümayəndəliyinin, Bakıda Rusiya İxrac Mərkəzinin nümayəndəliyinin açılması, qarşılıqlı ticarət missiyalarının həyata keçirilməsi və hər iki ölkə şirkətlərinin iştirakı ilə Azərbaycanda və Rusiyada keçirilən beynəlxalq sərgilər, birgə layihələrin icrası belə tədbirlərdəndir. Kənd təsərrüfatı, nəqliyyat, sənaye və s. sahələrdə əməkdaşlıq imkanları genişdir. Azərbaycan iş adamlarının Rusiyada bir sıra uğurlu layihələr reallaşdırdığı məlumdur. Artıq məlum olur ki, bizim iş adamları Rusiyadakı otelçilik biznesi və turizm sahəsinə ciddi yatırımlar edir. Bu kontekstdə bəzi iş adamlarının adı hallanır. Ancaq həmin adamların özü bu məlumatları nə təsdiqləyir, nə də təkzib edir. Bunun birbaşa Azərbaycan sərmayəsi olması vacibdir. Yəni kiminsə pulu var, gedib orada Rusiya vətəndaşının adına bir şirkət açıb bu işi görürsə, onun yalnız adı Azərbaycana aid olur. Yaxşısı budur ki, Rusiyaya şəffaf investisiyanın qoyuluşu təmin edilsin. Hər bir ölkə özünə investisiya qoyuluşunda maraqlıdır. İnvestisiya yatıran ölkənin də müəyyən təsir imkanları artmış olur. İstənilən halda, bu yaxşı göstəricidir. Həm də həmin ərazilərdə ermənilər kompakt yaşayır. Azərbaycan kapitalının həmin ərazilərə yatırılması bizim üçün olduqca vacib əhəmiyyət daşıyır”.
Məhəmmədəli QƏRİBLİ
