Ölkəmizdə alış-veriş sahəsində nağdsız ödəniş məsələsi daha çox təbliğ olunur və insanlar işlərini rahatlaşdırmaq üçün nağdsız ödənişlərə üstünlük verirlər. Lakin son zamanlar ən çox şikayət edilən məsələlərdən biri kartdan karta pul köçürülən zaman faiz tutulması ilə bağlıdır. Eyni bankın eyni kartlarından bir-birinə ödəniş ediləndə də bank pul tutur. Hətta “Kapitalbank”ın özündə aid olan bir kartdan digər karta ödəniş ediləndə 100 manata 1 manat faiz tutur.
Müştərilər deyir ki, terminaldan karta pul atanda pul tutulmur, amma kartdan karta pul köçürüləndə əlavə pul tutulur. Müştərilərdən biri şikayət edir ki, Tamkartdan başqa karta 35 manat pul köçürmək istəyib, lakin ondan 10 manat komissiya tələb olunub. Başqa kartdan isə 35 manata 1 manat tutulduğu deyilir. Bir sözlə, kartadan karta pul köçürərkən müştərilər əlavə maliyyə itkisinə məruz qalırlar.
Ölkədə nağdsız ödənişlər stimullaşdırılır, təbliğ olunur, amma banklar kartdan karta pul köçürülərkən müştəridən pul tuturlar.
Kartdan karta pul köçürülərkən pul tutulması nə dərəcədə düzgündür? Əgər nağdsız özdəniş bir tərəfdən müştərinin pul itkisinə səbəb olursa onda bu nəyə lazımdır, müştəri gedib nağd ödəniş etsin və pul itkisi ilə də üzləşməsin.
Ekspertlər deyir ki, bankların kartlardan pul tutması böyük problemə çevrilib. Onların sözlərinə görə, bir kartdan digər karta 300 manat pul köçürülürsə heç iki dəqiqə keçməmiş bank öz faizini tutur, müştəri hesabda azalma müşahidə edir. Ekspertlər deyir ki, banklar bununla möhtəkirlik edir və müştərinin cibinə girirlər.
“Hər dəfə müştərilər köçürmə və başqa bankların bankomatlarından istifadə zamanı vəsait itkisi ilə üzləşirlər, bu da onların haqlı narazılığına səbəb olur”
Tanınmış iqtisadçı Natiq Cəfərli bizimlə söhbətində bildirdi ki, bizim banklar bu cür hallara yol verir, amma bir sıra ölkələrdə banklar öz aralarında bu problemi həll ediblər. N.Cəfərli qeyd etdi ki, nəticədə də həmin ölkələrdə müştəri kartdan karta pul köçürəndə banklar faiz tutmur, bizdə isə hələ bu problem öz həllini tapmadığı üçün banklar kartla əməliyyatlar zamanı faiz çıxırlar: “Məsələn, bir çox ölkələrdə, o cümlədən də Gürcüstanda və Türkiyədə banklar arasında danışıqlar aparılır, müqavilələr imzalanır ki, bir-birinin köçürmələrindən, bankomatlarından istifadə edərkən ya heç pul tutulmur, ya da çox cüzi məbləğdə tutulur. Azərbaycanda banklar arasında belə bir anlaşma yoxdur. Yəni bizim vətəndaşlarımız Türkiyədə olanda görürlər ki, bankomatların üzərinə “bütün banklar üçün eyni dərəcədə keçərlidir” yazılır. Azərbaycanda isə banklar arasında elə bir müqavilə bağlanmayıb. Mərkəzi Bank və banklar Assosiasiyası bir yerdə bu problemi çözməlidir. Bu məsələ ilə bağlı onların birgə danışıqları, fəaliyyəti olmalıdır, banklar öz aralarında müqavilə bağlamalıdırlar və nəticədə bütün növ daxili köçürmələrdən və bankomatlardan istifadə üçün bütün növ əməliyyatlarda sıfır rüsüm tətbiq etməldirlər. Banklar arasında bu cür müqavilənin olmamasından vətəndaşlar əziyyət çəkir. Hər dəfə müştərilər köçürmə və başqa bankların bankomatlarından istifadə zamanı vəsait itkisi ilə üzləşirlər, bu da onların haqlı narazılığına səbəb olur”-deyə N.Cəfərli bildirdi.
İradə SARIYEVA
