Dünya ölkələri üçün hazırda ən ciddi problemlərdən biri də iqtisadi müstəvidə koronavirus pandemiyası səbəbindən üzləşdikləri tənəzzülü aradan qaldırmaqdır. Qeyd edilən xüsusda Azərbaycan əksər dünya ölkələri ilə müqayisədə daha əlverişli mövqedədir.
Hazırda ölkədə görülən işlər sayəsində koronavirus pandemiyası səbəbindən iqtisadiyyatda qeydə alınan azalma artıq artımla əvəz olunur. Cari ilin ilk yarısının yekunları da göstərir ki, artıq Azərbaycan iqtisadiyyatı tənəzzüldən çıxıb.
Açıqlanan statistik rəqəmlərə əsasən, qeyri-neft sektoru üzrə ixrac 2020-ci ilin müvafiq dövrü ilə müqayisədə 316,7 mln. ABŞ dolları və ya 30,5 % artıb.
“Azərbaycan üçün qeyri-neft sektorunun inkişafına birmənalı kənd təsərrüfatından başlanılmalıdır”
Qeyri-neft sektorunda qeydə alınan inkişafla bağlı fikir bildirən iqtisadçı ekspert Kamran Məmmədli qeyd etdi ki, iqtisadiyyatdakı artım pandemiya ilə bağlı qadağaların aradan götürülməsi ilə bağlıdır: “Qeyri-neft sektorunda iqtisadi aktivliyin yüksəlməsi bu ilin yanvarından sonra sərt karantin tədbirlərinin tətbiq edilməməsi və yumşalmalara gedilməsi ilə bağlıdır”.
Həmsöhbətimizin sözlərinə görə, qeyri-neft sektorundakı artım tempini nəzərə aldıqda, Azərbaycan iqtisadiyyatının bu ilin birinci rübünü artımla başa vuracağı gözlənilir: “Məhdudiyyətlərin azaldılması iqtisadi aktivliyə müsbət təsir göstərməklə yanaşı, məşğulluğun təmini baxımdan da vacibdir. Bu baxımdan, yoluxma sayı azalarsa, bir sıra məhdudiyyətlərin də aradan qaldırılacağı istisna edilmir”.
Ekspert onu da əlavə etdi ki, Azərbaycan üçün qeyri-neft sektorunun inkişafına birmənalı kənd təsərrüfatından başlanılmalıdır: “İdxaldan asılılığın azalması, daxili tələbatın ödənilməsi, regionlarda məşğulluğun artırılması və s. kimi bütün məsələlər öz həllini məhz kənd təsərrüfatında ciddi irəliləyişlərin olmasından tapa bilər. Amma bunu nəzəri cəhətdən, qanunlarda və rəsmi tədbirləri əks etdirən sənədlərdə yox, bunların yerlərdə praktik icrasına nail olmaq, həm də ən müasir innovativ yanaşmaların tətbiqi ilə nail olmaq lazımdır”.
Günel CƏLİLOVA
