Bölgələrimizdə sahibkarlıqla məşğul olmaq istəyən qadınlara hansı maneçiliklər olur…
Qadınların sahibkarlıq fəaliyyəti sadəcə Azərbaycanın deyil, həm də digər ölkələrin aktual məsələlərindən birinə çevrilib. Qabaqcıl ölkələrin təcrübəsi göstərir ki, qadın sahibkarlığın inkişafı yoxsulluğun azaldılmasına, qadınların iqtisadi və sosial nüfuzunun artırılmasına kömək edir.
Son zamanlar sahibkarlığın inkişafı istiqamətində aparılan işlər qadın sahibkarların sayına təsir göstərir. Açıqlanan statistik rəqəmlərə əsasən, qısa müddət ərzində Azərbaycanda sahibkar qadınların sayı artıb.
Danılmaz faktdır ki, Azərbaycanda qadın sahibkarlığın inkişafı üçün hər cür şərait yaradılıb. Prezident İlham Əliyevin qəbul etdiyi Strateji Yol Xəritələrinin icrası çərçivəsində yaradılan assosiasiya qadın sahibkarlığının inkişafında, qadın sahibkarlığı sahəsində təşəbbüskarlığın artırılmasında, sahibkar qadınların maraqlarının qorunmasında, şəffaflıq və sosial məsuliyyət prinsipləri əsasında onlara biznes xidmətlərinin göstərilməsində mühüm rol oynayır. Qeyd edək ki, 2020-ci ildə 174 329 sahibkarlıq subyekti qeydiyyata alınıb, onlardan 9230-u kommersiya hüquqi şəxs, 165 099-u fərdi sahibkardır. Kommersiya hüquqi şəxslərin 14,8 faizinin (1373) təsisçisi və fərdi sahibkarların 20,4 faizi (33 742) qadındır.
Qeyd etdiyimiz kimi, ölkədə sahibkarlıqla məşğul olan qadınların sayı artıb. Ancaq bölgələrdə biznesmen qadınların fəaliyyətinə maneəçilik yaradılır. Onların sahibkarlıqla məşğul olmasına müəyyən şərait yaradılmır.
- “Hansısa rayonda qadın iaşə obyekti açmaq istəyir, ancaq həmin ərazidə eyni fikirdə olan bəy də olur. Bəy qadına təzyiq göstərərək obyekt açmasına maneə olur”
“Vəfa” Sosial İctimai Birliyinin sədri Fatimə Hacıbəyli bizimlə söhbətində bildirdi ki, qadınlara sahibkarlıq sahəsində dəstək olmaq lazımdır. Qadın sahibkarlar əksər hallarda bütün yükü öz üzərlərinə götürürlər.
Həmsöhbətimiz onu da əlavə etd ki, sahibkarlıqla məşğul olan qadınların sayının artması sevindiricidir. Bu, qadın sahibkarlığının inkişafı ilə yanaşı, əlavə iş yerlərinin yaranması deməkdir. Qadınların iqtisadi cəhətdən gücləndirilməsi onların iqtisadi asılılıqdan azad olmasına səbəb olur: “Qadın sahibkarların sayının artması səbəblərindən biri onların öz işinə məsuliyyətlə yanaşmasıdır. Hansısa qadın hər hansı bir işi görmək üçün bankdan müəyyən məbləğdə kredit götürür. Əksər hallarda o xanımlar bankdan götürdükləri krediti vaxtlı-vaxtında geri qaytarırlar. Yəni onlar öz işlərini qururlar, həm gəlir əldə edirlər, həm də borclarını qaytarırlar”.
Birlik sədrinin sözlərinə görə, bu gün bölgələrdə sahibkarlıqla məşğul olmaq istəyən qadın müəyyən çətinliklər yaradılır: “Bu hal ya onların ailələri tərəfindən baş verir. Bəzi ailələrdə sahibkarlıq fəaliyyəti ilə məşğul olmaq istəyənlərə maneçilik törədilir. Qadınlara əsasən xanımın maddi gəlirinin artacağından qorxan kişilər mane olur. Kişilər düşünürlər ki, qadının maddi gəliri artarsa, onların ailədə söz demək hüququ azalar. Həmçinin, hansısa rayonda qadın iaşə obyekti açmaq istəyir, ancaq həmin ərazidə eyni fikirdə olan bəydə olur. Bəy qadına təzyiq göstərərək ona obyekt açmaması üçün çalışır. Bəzi hallarda qadın fikrindən daşınır, bəzən də mübarizə apararaq istəyinə nail olur”.
Günel CƏLİLOVA
