Bir ayda 200 milyon bank əmanəti geri çəkildi - nə baş verir…

Natiq Cəfərli: “Qarşıdakı aylarda da depozitlərin həcmində azalma müşahidə oluna bilər”

img

2021-ci ilin iyul ayının 1-nə Azərbaycanda kredit təşkilatlarında yerləşdirilmiş depozit və əmanətlərin həcmi 24 156 600 000 manat təşkil edib.

Mərkəzi Bankın yaydığı məlumata əsasən, 2020-ci ilin iyul ayının əvvəli ilə müqayisədə depozit və əmanətlərin həcmi 7,1 faiz artıb. Belə ki, vəsaitlərdən 8 435 400 000 manatı fiziki şəxslərin əmanətlərini, 1 775 300 000 manatı maliyyə təşkilatlarının, 13 945 800 000 manatı isə qeyri-maliyyə təşkilatlarının vəsaitlərini əhatə edib.

Fiziki şəxslərin banklardakı əmanətlərinin həcmi ötən illə müqayisədə azalıb. İyun ayı ərzində fiziki şəxslərin banklardakı əmanətlərinin həcmi 199 800 000 manat azalıb. Onların əmanətlərinin 54,3 faizi milli valyutada (4 581 800 000 manat), 45,7 faizi isə xarici valyutada (3 853 700 000 manat ekvivalentində) olub.

Maraqlıdır, bank əmanətlərinin həcmi niyə azalıb və bir ay ərzində 200 milyon manat depozit banklardan nə səbəbdən geri çəkilib?

İqtisadçı ekspert Natiq Cəfərli bildirdi ki, bank əmanətlərinin həcminin azalması gözlənilən idi: “Pandemiya ilə əlaqədar olaraq iş yerlərinin sayının azalması, insanların gəlirinin ötən illərlə eyni olmaması banklarda olan əmanətlərin geri çəkilməsinə səbəb olub. Nəzərə almaq lazımdır ki, vətəndaşların gəliri azaldıqca yığılan vəsaitin xərclənməsi də artır. Açıqlanan rəsmi rəqəmlərdə də işsizliyin artması təsdiq olunur. Bununla yanaşı, əhalinin real gəliri də azalıb. Bu kimi səbəblər bank əmanətlərinin geri çəkilməsinə səbəb olur”.

Həmsöhbətimiz hesab edir ki, qarşıdakı aylarda da depozitlərin həcmində azalma müşahidə oluna bilər: “İqtisadi aktivliyin lazımi səviyyədə olmaması insanları daha çox öz yığımına meyl etməyə vadar edir”.

Günel CƏLİLOVA

Son xəbərlər