Məlum olduğu kimi, 2019-cu ildən fiziki şəxslərin problemli kreditləri ilə bağlı kompensasiyaların ödənişi həyata keçirilib. Onu da bildirək ki, həmin il kompensasiyanın ödənilməsi prosesində yaranan problemlərin həlli üçün Apelyasiya Komissiyası da yaradılıb. Çoxlu sayda vətəndaş dollar krediti ilə bağlı kompensasiya ödənişini əldə edib.
Ancaq bəzi şəxslər var ki, hələ də problemli kreditlə bağlı kompensasiya əldə edə bilməyiblər. O şəxslərdən biri də Bakı sakini Xavər Xudaverdiyevadır. X.Xudaverdiyeva 3 ildir ki, onun üçün təyin olunmuş 3678 manat 47 qəpik kompensasiyanı ala bilmir: “2014-cü ildə bankdan 36 ay müddətinə illik 28 faiz olmaqla 5700 ABŞ dolları məbləğində nağd pul krediti götürmüşəm. Məbləğ 2017-ci ildə tam şəkildə banka ödənilib. Dollarla bağlanan kredit müqavilələrinə görə, zərərçəkmiş vətəndaşlara kompensasiyanın ödənilməsini nəzərdə tutan, Prezidentin 2019-cu ilin fevral ayının 28-də imzaladığı fərmana əsasən, kompensasiya təyin olunub. Lakin məbləğ bu günə qədər ödənilməyib. Onu da qeyd edim ki, Bakı İnzibati Məhkəməsi 12 noyabr 2020-ci ildə məbləğin hesablanmasının Mərkəzi Bankın öhdəliyində olduğuna dair qərar qəbul edib. Mərkəzi Bank da adımın kompensasiya alacaq şəxslər siyahısında olduğunu təsdiqləyib”.
Maliyyə Nazirliyi: “Məsələ nəzarətə götürülüb, sənədlər əsasında araşdırma aparılır”
Məsələ ilə bağlı Maliyyə Nazirliyindən bildirildi ki, məsələ nəzarətə götürülüb. Sənədlər əsasında araşdırma aparılır.
Əkrəm Həsənov: “Problemli kreditə görə vətəndaşa təyin edilən məbləğ ödənilmirsə, o zaman həmin şəxs məhkəməyə müraciət edə bilər”
Bank sahəsi üzrə ekspert Əkrəm Həsənov qeyd etdi ki, problemli kreditə görə vətəndaşa kompensasiyanın ödənilməsi prosesinin icra olunmamasının bir neçə səbəbi olar bilər: “Ola bilər ki, vətəndaş ona təyin olunacaq məbləği düzgün hesablamır. Bəziləri məlum fərmanı düzgün başa düşmürlər. Belə ki, vətəndaşın banklara olan borcu 10 mindən çoxdursa, ona kompensasiya ödənişi düşmür. Onu da deyim ki, o vaxt Maliyyə Bazarlarına Nəzarət Palatası vətəndaşlara düzgün məlumat verməyib. İndi həmin palata olmadığı üçün, vətəndaş qalıb çarəsiz. Vətəndaşa ödənilən məbləğ Mərkəzi Bankın siyahısında göstərilərsə və ona təyin edilən məbləğ ödənilmirsə, o zaman həmin şəxs məhkəməyə müraciət edə bilər”.
Günel CƏLİLOVA
