Azərbaycanlılar xarici valyuta ilə bank əmanətlərini artırmağa meylli olmağa başlayıblar
Son aylar əhalinin banka yerləşdirdiyi əmanətlərin həcmi artıb. Mərkəzi Bankın yaydığı məlumatda qeyd edilir ki, yanvarın 1-nə əhalinin banklardakı əmanətlərinin milli valyuta ekvivalentində məbləği dekabr ayı ərzində 269,7 milyon manat artaraq 8 milyard 177,9 milyon manat təşkil edib. Açıqlanan statistik məlumatlara əsasən, əmanətlərin 50,8 faizi xarici, 49,2 faizi isə milli valyutada qoyulub. Qeyd edək ki, xarici valyuta ilə banka yerləşdirilən əmanətlərin həcmi artıb.
Onu da vurğulayaq ki, əksər xarici ölkədə pandemiya ilə əlaqədər olaraq bank əmanətlərinin həcmi azaldı. Ancaq bizdə isə bu hal müşahidə edilmədi. Bank əmanətlərinin həcmi artdı.
- “...insanlar dolların məzənnəsinin manata nisbətən dəyişəcəyini düşünürlər”
Məsələ ilə bağlı fikir bildirən iqtisadçı-ekspert Kamran Məmmədli qeyd etdi ki, pandemiyanın ölkə iqtisadiyyatına güclü təsir etməməsi hər kəsə bəllidir: “Nəzərə almaq lazımdır ki, elə ölkələr var, orada pandemiyanın təsirləri daha böyük miqyasda özünü göstərir. Digər əsas səbəblərdən biri də depozitlərin hansı motivlə banka qoyulması ilə bağlıdır. Depozit qoyanların müəyyən hissəsi hesab edir ki, bəlli bir müddətdən sonra pandemiya başa çatacaq və onlar öz məqsədlərinə çatacaqlar. Bu səbəbdən depozitləri banklarda saxlayaraq gözləmə mövqeyi tuturlar. Başqa bir tərəfdən, bu, müştərinin xərc strukturundan asılıdır. İqtisadi fəallığın azalması, xarici turist səfərlərinin olmaması da depozitlərin banklardan çıxarılma vəziyyətinə öz təsirini göstərir. Bəziləri fikirləşirlər ki, iqtisadi vəziyyət daha da pisləşə bilər. Bu səbəbdən depozitləri çətin günlərə saxlayırlar. Yəni deməyim odur ki, bu məsələdə motiv çoxdur. Azərbaycan əhalisinin yerli xüsusiyyətlərdən irəli gələrək məsələyə yanaşması var. Yəni baş verənlərə daha ehtiyatlı yanaşırlar. Bütün hallarda, görünən odur ki, bizdə pandemiyanın törətdiyi fəsadlar digər ölkələrə baxanda elə də böyük deyil”.
Həmsöhbətimiz hesab edir ki, pandemiya dövründə əhalinin banklarda depozitləri artmağa doğru gedəcək: “Xarici valyuta ilə bank əmanətlərinin həcminin artması səbəblərindən biri də insanların dolların məzənnəsinin manata nisbətən dəyişəcəyini düşünmələridir. Bu səbəbdən də insanlar xarici valyutaya üstünlük verirlər”.
Günel CƏLİLOVA
