Pandemiya ilə əlaqədar olaraq ötən il bır sıra ölkələr büdcə daxilolmaları üzrə işləri, proqnozları yerinə yetirə bilməyib. Ancaq Azərbaycanın dövlət büdcəsinə daxilolmalar proqnozu 2,3 faiz üstələyib.
Belə ki, 2020-ci ildə dövlət büdcəsinin gəlirləri 24 mlrd. 679 mln. 200 min manat təşkil edib. Bu barədə Maliyyə Nazirliyinin məlumatında deyilir. Qeyd olunub ki, 2020-ci ildə gəlirlər üzrə proqnoz 24 mlrd. 124 mln. manat təşkil edirdi. Maliyyə Nazirliyinin məlumatında qeyd edilir ki, daxilolmalar üzrə dövlət büdcəsinin icrası proqnozu 2,3 faiz üstələyib. Dövlət büdcəsinin qeyri-neft sektoru üzrə gəlirləri 10 mlrd. 677 mln. 200 min manat təşkil edib və proqnozu 5,4 faiz üstələyib. Dövlət Vergi Xidmətinin xətti ilə dövlət büdcəsinə 7 mlrd. 387 mln. 200 min manatın köçürülməsi təmin edilib, bu da proqnozdan 2,7 faiz çoxdur. Bu məbləğdən 75,6 faizi qeyri-neft sektorunun payına düşür. Dövlət Gömrük Komitəsinin dövlət büdcəsinə köçürmələri 3 mlrd. 938 mln. manat təşkil edib.
Maraqlıdır, bizdə büdcə daxilolmalarında kəsirin olmaması nədən irəli gəlir?
“Dövlət proqramına uyğun olaraq özəl sektorun daha böyük ziyan çəkməməsi üçün müvafiq tədbirlər həyata keçirildi”
Sözügedən məsələyə aydınlıq gətirən millət vəkili Aydın Hüseynov Azərbaycanda büdcə gəlirləri üzrə daxilolmaların artıqlaması ilə yerinə yetirilməsini bir sıra faktorlarla əlaqələndirdi: “Bunun başlıca səbəbi düzgün iqtisadi siyasətin aparılması ilə bağlıdır. Məhz bunun sayəsində büdcə proqnozlarının icrasında ciddi çətinliklər yaranmayıb. Bəzi ölkələrdə bununla bağlı ciddi sıxıntıların yaşandığı bir dövrdə Azərbaycan öhdəlikləri artıqlaması ilə yerinə yetirə bilib. Büdcə gəlirləri artıb. Digər tərəfdən, pandemiyanın başlanğıcında və sonrakı ən ağır dövrdə Prezident İlham Əliyevin rəhbərliyi ilə dövlət proqramı ortaya qoyuldu. Proqramda həm pandemiyaya qarşı mübarizə, həm də onun nəticələrinin aradan qaldırılması ilə bağlı tədbirlər öz əksini tapdı. Dövlət proqramına uyğun olaraq, özəl sektorun daha böyük ziyan çəkməməsi üçün müvafiq tədbirlər həyata keçirildi. Eyni zamanda, maliyyə və bank sektorunun sağlamlaşdırılması üçün sahibkarlıq subyektlərinin fəaliyyətinin təmin edilməsi üçün dövlət büdcəsindən vəsait ayrıldı. Başqa bir tərəfdən, qeyri-neft sektorunun kənd təsərrüfatı və sənaye bölmələrində görülən işlər büdcə öhdəliklərinin proqnoza uyğun yerinə yetirilməsində vacib rol oynayıb”.
Millət vəkili hesab edir ki, bütün bu işlərin kompleks şəkildə görülməsinin nəticəsində büdcə proqnozları artıqlaması ilə yerinə yetirilib.
Vidadi ORDAHALLI
