Azərbaycanda büdcə xərclərinin optimallaşdırılması, dövlət satınalmalarında şəffaflığın təmin edilməsi hər zaman müzakirə mövzusu olub.
Qeyd edək ki, ölkə başçısı İlham Əliyev dəfələrlə öz çıxışında dövlət qurumlarının xərclərinə nəzarətin gücləndirilməsinin vacib olduğunu vurğulayıb. Ancaq buna baxmayaraq, dövlət satınalmalarında hələ bəzi problemlər yaşanır. Xüsusilə də biznesin, sahibkarlığın, rəqabət mühitinin inkişafına mane olunur.
Hətta dövlət satınalmalarında yaşanan çatışmazlıqlar bəzi sahibkarların tenderlərdə iştirakına əngəl olur.
Qeyd edək ki, bu günlərdə “CETA Translations” tərcümə mərkəzinin rəhbəri İsmayıl Cəbrayılov mediaya açıqlamasında qeyd edib ki, əksər halda tenderlərin nəticələri öncədən bəlli olur və formal olaraq keçirilir. Məsələn, kənd təsərrüfatı sahəsində çalışan şirkət tərcümə ilə bağlı tenderin qalibi elan edilir. İştirakçılarla bağlı ciddi tələblərin qoyulduğu satınalmada informatika müəllimi qalib elan edilir. Eyni şəxs 4 şirkəti təmsil edərək tenderdə iştirak edir. Bu isə rəqabətliliklə bağlı qaydaları pozur.
Bu kimi hallar son zamanlar keçirilən tenderlərlə bağlı narazılıqların artmasına səbəb olur. Həmçinin, yeni yaranan şirkətlərin də tenderlərdə qalib olması sahibkarların haqlı narazılığına səbəb olur.
“Qanuna əsasən, məbləği 50 min manatdan yüksək olan açıq tenderlər elektron qaydada keçirilməlidir, amma...”
Məsələ ilə bağlı fikir bildirən hüquqşünas Əkrəm Həsənov qeyd etdi ki, bu sahədə kifayət qədər neqativ hal yaşanır: “Məlumat üçün bildirim ki, qanuna əsasən, məbləği 50 min manatdan yüksək olan açıq tenderlər elektron qaydada keçirilməlidir. Amma əksər dövlət qurumu buna riayət etmir. Məsələn, məhkəmədə hüquqlarını müdafiə etdiyim sahibkar belə bir halla üzləşib. Açıq tender 50 min manatdan yuxarı olduğu halda, elektron qaydada keçirilməyib. Bundan əlavə, iddiaçını zərflərin açılması proseduruna buraxmayıblar. Ümumiyyətlə, bu sahədə sadalanan mövcud faktlar dövlət satınalmaları sahəsində problemlər haqqında müəyyən qədər də olsa görüntü yaratmış olur”.
Günel CƏLİLOVA
