Pandemiyanın dünyada iqtisadiyyata təsir etdiyi sahələrdən biri də tikinti materrialları istesalı sahəsi olub. Pandemiya səbəbindən bir sıra ölkələrdə tikinti materiallarının istehsalı kəskin şəkildə azalıb. Məsələ ondadır ki, böhran səbəbindən tikinti materiallarına olan tələbat azalıb. Bu da, istər-istəməz, istehsalın azalmasına öz təsirini göstərir.
Ancaq maraqlıdır ki, bir sıra ölkələrdə sözügedən məhsul istehsalı nəzərəçarpacaq dərəcədə azaldığı halda, Azərbaycanda tikinti materiallarının istehsalında azalma çox cüzi olub. Belə ki, ötən il tikinti materiallarının istehsalı 0,1 faiz azalıb. 2020-ci ildə tikinti materialları istehsalının ümumi dəyəri 718,9 milyon manat həcmində qiymətləndirilib, bu da əvvəlki illə müqayisədə 0,1 faiz azdır. Bununla yanaşı, il ərzində sement istehsalı (3 mln. 226 min ton) 7,5 faiz, tikinti əhənginin istehsalı (34,3 min ton) 23,1 faiz azalıb.
Onu da qeyd edək ki, tikinti materialları istehsalı sahəsi əməktutumlu sektordur. Sözügedən sahədə istehsalın cüzi azalması müsbət tendensiyadır. Maraqlıdır, bəs ekspertlər bunu necə dəyərləndirirlər? Bizdə bu sahədə azalmanın cüzi olması nə ilə bağlıdır?
“Bu il tikinti materialları istehsalı sahəsində azalma yox, artım olacaq”
Məsələyə münasibət bildirən iqtisadçı-ekspert Fuad İbrahimov Azərbaycanda sözügedən sahədə azalmanın cüzi olmasını dövlətin sosial layihələri ilə əlaqələndirdi: “Ümumən, bu, müsbət tendensiyadır. Dövlət xətti ilə olan sifarişlər bu sahədə azalmanın elə də böyük olmamasına şərait yaradıb. Söhbət ondan gedir ki, sosialyönümlü tikinti layihələrində ixtisarlar olmayıb. Ötən il Prezident İlham Əliyev də çıxışlarında qeyd etdi ki, pandemiya səbəbindən sosial layihələrin icrası dayandırılmayacaq. Bununla yanaşı, 2019-cu ili dinamik artımla başa vurduğumuz üçün bütün bunlar tikinti sektoruna öz müsbət təsirini göstərdi. Bir məqamı xüsusi qeyd edim ki, qabaqlayıcı və digər tədbirlər mənfi fəsadların qarşısını aldı. Bütövlükdə, pandemiya dövründə hökumətin atdığı addımlar iqtisadiyyatın elastikliyinin qorunmasına hesablandı. Ona görə də bizdə digər ölkələrlə müqayisədə iqtisadi itkilər elə də böyük olmadı”.
İqtisadçı-ekspert hesab edir ki, bu il tikinti materialları istehsalı sahəsində azalma yox, artım olacaq.
Vidadi ORDAHALLI
