Məlum olduğu kimi, Tarif Şurasının qərarına əsasən, bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub.
Onu da qeyd edək ki, “Azərsu” ASC-nin xərclərinin ödənilməsi üçün dövlət büdcəsindən subsidiya ayrılır. 2021-ci ildə dövlət büdcəsindən 45 milyon manat ayrılıb.
Bildirək ki, su qiymətlərinin qalxması ilə büdcədən “Azərsu” ASC-yə ayrılan 45 milyon manat vəsait sərbəstləşir və onu büdcədən digər sosial sahələrə ayırmaq imkanı yaranır. Maraqlıdır, bu vəsait əsasən hansı sahələrə ayrılsa daha yaxşı olar?
“Adıçəkilən qurum dövlətə xeyir vermək istəyirsə, ilk növbədə, öz işini düzgün təşkil etməli, təsərrüfat fəaliyyəti effektiv xarakter daşımalıdır”
İqtisadçı-ekspert Pərviz Heydərov bizimlə söhbətində qeyd etdi ki, “Azərsu” ASC və bu tipli digər qurumlar dövlət büdcəsinə real olaraq iki-üç qat ödəmə etmək iqtidarındadırlar: “Bu qurumların təsərrüfat fəaliyyətinə nəzər salsaq görərik ki, onlar dövlətdən asılı vəziyyətdədirlər.
Onu da deyim ki, suyun qiymətinin qalxması ilə “Azərsu” ASC-yə ayrılan 45 milyon manat sərbəst vəsait olacaq. Hazırda hər kəsi bu vəsaitin necə xərclənməsi maraqlandırır. Məlumdur ki, sosial, iqtisadi sahədə dövlətin öz siyasəti var. Bu sahədə dövlətin öz gəliri var. Adıçəkilən qurum dövlətə xeyir vermək istəyirsə, ilk növbədə, öz işini düzgün təşkil etməli, təsərrüfat fəaliyyəti effektiv xarakter daşımalıdır”.
Həmsöhbətimiz hesab edir ki, tariflərin artırılması “Azərsu” Açıq Səhmdar Cəmiyyətinin büdcədən asılılığını azaldacaq. Büdcədə yaranmış əlavə imkanlar, əlavə maliyyə vəsaitləri əhalinin, istehlakçıların digər xidmətlərinə istiqamətləndiriləcək.
Günel CƏLİLOVA
