Azərbaycan Mərkəzi Bankının (AMB) dekabrda yenilənmiş proqnozlarına görə, ölkədə inflyasiyanın 2021-ci ildə 4% diapozonunda formalaşacağı gözlənir. Bu barədə faiz dəhlizinin parametrlərinə dair onlayn mətbuat konfransında çıxış edən AMB-nin sədri Elman Rüstəmov deyib. Onun sözlərinə görə, bu, fiskal stimullaşdırılma və istehlakın bərpası ilə bağlıdır.
Məlumat üçün bildirək ki, 2020-ci ildə Azərbaycanda inflyasiya 2,8% təşkil edib.
Maraqlıdır, 4 faizlik inflyasiya həddi normal sayıla bilərmi? Bu, əhalinin yaşayış tərzinə, yaşayış fəaliyyətinə necə təsir edəcək?
“Elə etmək lazımdır ki, inflyasiya əhalinin alıcılıq qabiliyyətinə təsir etməsin”
İqtisadçı-ekspert Əli Əlirzayev hesab edir ki, cari il üçün inflyasiyanın 4 faiz səviyyəsində olması normaldır. İnflyasiyanın 4 faiz olması elə də çox deyil: “Nəzərə almaq lazımdır ki, iqtisadiyyatın bütün tənəzzülü 2,3-2,8 faiz arasında dəyişir. Nəzərə almaq lazımdır ki,bu il qiymət artımları üçün ciddi zəmin yaranmayacaq. Bu baxımdan 2021-ci il üçün istehlak bazarında qiymətlərin tənzimlənən həddə, yəni qeyd olunan səviyyədə olacağı gözlənir. Onu da deyim ki, bu il ərzaq və kənd təsərrüfatı məhsullarının mərhələli şəkildə yerli istehsalın hesabına ödənilməsi nəzərdə tutulur. Bu da istehlak bazarındakı qiymətlərin optimallaşdırılmasına səbəb olacaq. Bu baxımdan 2021-ci ildə bütünlükdə istehlak bazarında qiymətlərin tənzimlənən həddə olacağı gözlənir".
Həmsöhbətimiz onu da əlavə etdi ki, inflyasiyanın olması vacibdir. Nəzərə almaq lazımdır ki, inflyasiya olmasa, kapital, investisiya olmaz. İnflyasiyanın müəyyən həddə olması inkişaf deməkdir: "Ancaq elə etmək lazımdır ki, inflyasiya əhalinin alıcılıq qabiliyyətinə təsir etməsin”.
Günel CƏLİLOVA
