Xəbər verildiyi kimi, Rusiyanın baş naziri Mixail Mişustin 1 mart tarixindən buğda ixracına tətbiq edilən rüsumun qaldırılması barədə fərman imzalayıb. Rusiya baş nazirinin imzaladığı fərmana əsasən, 1 mart tarixindən etibarən buğdanın hər tonu üçün ixrac rüsumu 25 avrodan (51,5 manat) 50 avroya (103 manat) qaldırılır.
Bəs görəsən Rusiyada buğdaya tətbiq olunan ixrac rüsumunun qaldırılması Azərbaycanda buğdanın qiymətinə necə təsir edəcək?
Məlumat üçün bildirək ki, ötən ilin ilk 11 ayında xarici ölkələrdən Azərbaycana 1 milyon 225,6 min ton buğda idxal olunub. İxrac olunan buğdanın təxminən 98%-i və ya 1,2 milyon tonu Rusiyanın payına düşüb. Rusiyadan ixrac olunan buğdanın 1 tonunun gömrük dəyəri 212 dollar (361 manat) olur.
Onu da bildirək ki, ötən il Azərbaycanda 1 milyon 867,3 min ton buğda istehsal olunub. 2019-cu ildə isə ölkədə 2 milyon 171,5 min ton buğda istehsal edilib. Rəqəmlərdən də göründüyü kimi, son bir ildə buğda istehsalı 304 min ton və ya 14% azalıb.
Azərbaycanda buğdaya olan illik tələbatın 3 milyon tondan çox olduğunu nəzərə alsaq, bu il də Azərbaycanın xaricdən 1 milyon tondan çox buğda idxal etməsi lazımdır. Əgər Rusiyadan buğda ixracı davam edərsə, bu, buğdanın hər tonunda təxminən 50 manat bahalanma deməkdir.
“Rusiyadan alınan taxılın həcmi son zamanlar çox idi, bu qiymət artımı Azərbaycanda unun, çörəyin...”
İqtisadçı-ekspert Natiq Cəfərli qeyd etdi ki, Rusiya daxili ehtiyacların ödənilməsi məqsədilə taxıl ehtiyatlarından ölkədə istifadə olunması imkanlarını genişləndirir: “İxracla bağlı qəbul edilən qərar Rusiyadan taxıl alan bütün ölkələrə, o cümlədən, Azərbaycan və Türkiyəyə təsir edəcək. Türkiyə də Rusiyadan kifayət qədər böyük həcmdə taxıl alır. Təbii ki, Rusiyadan alınan taxılın qiyməti qalxarsa, Azərbaycanda unun qiymətinin qalxması qaçılmaz olacaq. Çünki Azərbaycanın yerli taxılından keyfiyyətli un istehsal etmək mümkün deyil. Azərbaycan həm Qazaxıstandan, həm Rusiyadan, həm də Ukraynadan taxıl alır. Rusiyadan alınan taxılın həcmi son zamanlar çox idi. Bu qiymət artımı Azərbaycanda unun, çörəyin, həm də digər un məmulatlarının - makaronun, vermişelin qiymətinin artmasına təsir göstərəcək. Həmçinin, Rusiyadan idxal olunan hazır un məmulatları var ki, onların da qiymətində müəyyən dəyişikliklərin olması gözlənir”.
Həmsöhbətimiz onu da əlavə etdi ki, un və un məmulatlarında qiymət artımı olsa da, bu, digər məhsullara təsir etməyəcək: “Azərbaycanda dənli bitkilərin böyük bir hissəsi yem kimi istifadə olunduğundan, xaricdən, demək olar ki, bu məqsədlə dənli bitkilər alınmır. Daha çox toxum və un istehsalı üçün xaricdən dənli bitkilər idxal edilir”.
Günel CƏLİLOVA
